ଭୁବନେଶ୍ବର: ଶରୀରର ଏକ ମୁଖ୍ୟ ଅଙ୍ଗ ହେଉଛି ହୃତପିଣ୍ଡ ବା ହାର୍ଟ। ଏହା ସୁସ୍ଥ ଓ ନିରୋଗ ରହିଲେ ମଣିଷ ସୁସ୍ଥ ରହିଥାଏ । କିନ୍ତୁ ସାମ୍ପ୍ରତିକ ପରିସ୍ଥିତିରେ ହୃଦଘାତ ରୋଗୀଙ୍କ ସଂଖ୍ୟା ବଢିବାରେ ଲାଗିଛି, ଯାହା ଚିନ୍ତାର ବିଷୟ ତେଣୁ ଏଥିରୁ ରକ୍ଷା ପାଇଁ ଶରୀରକୁ ସୁସ୍ଥ ସୁନ୍ଦର ରଖିବା ଜରୁରୀ ଓ ନିୟମିତ ସାଇକେଲ ଚଲେଇବା ଉଚିତ୍ ବୋଲି କହିଛନ୍ତି ଓଡ଼ିଆ ସିନେଷ୍ଟାର ତଥା ପୂର୍ବତନ ଏମପି ଓ ଜଣେ ନିୟମିତ ସାଇକେଲ ଚଲାଳି ସିଦ୍ଧାନ୍ତ ମହାପାତ୍ର ।
ଆଜି ବିଶ୍ୱ ହୃତପିଣ୍ଡ ଦିବସ ଅବସରରେ ଆମ୍ରି ହସ୍ପିଟାଲ ପକ୍ଷରୁ ଆୟୋଜିତ ହୋଇଥିବା ସାଇକ୍ଲୋଥନରେ ଭାଗନେଇ ଥିବା ଶ୍ରୀ ମହାପାତ୍ର କହିଛନ୍ତି ଯେ, ସୁସ୍ଥ ରହିବା ପାଇଁ ନିୟମିତ ବ୍ୟାୟାମ ଆବଶ୍ୟକ। ଆଉ ସେଥିପାଇଁ ସାଇକେଲ ଏକ ଉପଯୁକ୍ତ ମାଧ୍ୟମ । ଏହାଦ୍ୱାରା ଶରୀରର ସମସ୍ତ ଅଙ୍ଗ ପ୍ରତ୍ୟେଙ୍ଗର ଉପଯୁକ୍ତ ବ୍ୟାୟାମ ହୋଇଥାଏ । ଖାଲି ଏତିକି ନୁହେଁ ଭାରତ ଏକ ବିକାଶ ଗତି କରୁଥିବ ଦେଶ ହୋଇଥିବାବେଳେ ଏଥିପାଇଁ ଏ ଦେଶର ଅର୍ଥନୀତି ମଧ୍ୟ ଗୁରୁତ୍ୱ ରଖେ ।
ପ୍ରତିଦିନ ଯଦି ଲୋକମାନେ ସାଇକେଲ ଚଳାଇବେ ତେବେ ତେଲ ପୋଡ଼ାରେ ଯେତିକି ଅର୍ଥ ଖର୍ଚ୍ଚ ହେଉଛି ତାହା ବଞ୍ଚିବା ସହିତ ପରିବେଶ ପ୍ରଦୂଷଣକୁ ଅନେକ ମାତ୍ରାରେ ରୋକାଯାଇ ପାରିବ। ଏହା ସହିତ ଟ୍ରାଫିକ ସମସ୍ୟାର ଅନେକ ସମାଧାନ ହେବା ସହିତ ଲୋକମାନଙ୍କୁ ନୂଆ ମୋଟରଯାନ ଆଇନରେ ହେଉଥିବା ଅସୁବିଧାରୁ ରକ୍ଷା ମିଳିବ ବୋଲି ସେ କହିଛନ୍ତି । ତେଣୁ ନିଜକୁ ସୁସ୍ଥ ରଖିବା ସହିତ ଦେଶକୁ ପ୍ରଗତି ପଥରେ ଆଗେଇ ନେବାକୁ ପ୍ରତିଦିନ ଲୋକମାନେ ସାଇକେଲ ଚଲାଇବାକୁ ସେ ଅନୁରୋଧ କରିଛନ୍ତି । ଅନ୍ୟପକ୍ଷେ ଆମ୍ରି ହସ୍ପିଟାଲର ଡାକ୍ତର ଡ଼ଃ ଜିତେନ୍ଦ୍ର ପଟ୍ଟନାୟକ ନିଜକୁ ଫିଟ୍ ରଖିବା ସହିତ ଜଟିଳ ରୋଗ ଆକ୍ରମଣ ଠାରୁ ନିଜକୁ ଦୂରେଇ ରଖିବା ପାଇଁ ସାଇକେଲିଙ୍ଗ୍ ଏକ ଉତ୍ତମ ପଦକ୍ଷେପ ବୋଲି କହିଛନ୍ତି । ତେଣୁ ହସ୍ପିଟାଲ ପକ୍ଷରୁ ଲୋକମାନଙ୍କୁ ସଚେତନ କରିବା ପାଇଁ ଏହି ପ୍ରୟାସ ହୋଇଥିବା ସେ କହିଛନ୍ତି ।
ବାଣୀବିହାର ନିକଟରୁ ବାହାରିଥିବା ଏହି ସାଇକ୍ଲୋଥନକୁ ଡିସିପି ଅନୁପ ସାହୁ, ସିନେ ଅଭିନେତା ଆକାଶ ଦାଶ ନାୟକ, ଭାରତୀୟ ମହିଳା ଫୁଟବଲ ଦଳର ପୂର୍ବତନ ଅଧିନାୟିକା ଶ୍ରଦ୍ଧାଞ୍ଜଳି ସାମନ୍ତରାୟ, ଆମ୍ରି ହସ୍ପିଟାଲର ଉପସଭାପତି ଡ଼ଃ ଅନୁଜ ତିୱାରି , ସିନେ ଷ୍ଟାର ସିଦ୍ଧାନ୍ତ ମହାପାତ୍ର ପ୍ରମୁଖ ପତାକା ଦେଖାଇ ଉଦଘାଟନ କରିଥିଲେ। ଏହା ୟୁନିଟ-1ରେ ଥିବା ଆଦିବାସୀ ପଡିଆ ଠାରେ ଶେଷ ହୋଇଥିବା ବେଳେ ଏଥିରେ ଛୋଟ ପିଲାଙ୍କଠାରୁ ଆରମ୍ଭ କରି ଯୁବକଯୁବତୀ ଓ ବୟସ୍କ ଲୋକମାନେ ଅନେକ ସଂଖ୍ୟାରେ ଯୋଗଦେଇଥିଲେ । ସକାଳ 6ଟାରୁ ଆରମ୍ଭ ହୋଇଥିବା ଏହି ସାଇକ୍ଲୋଥନକୁ ଆମରି ହସ୍ପିଟାଲ ପକ୍ଷରୁ ସୁନ୍ଦର ଭାବେ ପରିଚାଳନା କରାଯାଇଥିବାବେଳେ ଟ୍ରାଫିକ ପୋଲିସ ଏହାକୁ ସହଯୋଗ କରିଥିବା ଦେଖିବାକୁ ମିଳିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
