ଭୁବନେଶ୍ବର: ଫନି ଉଜାଡିଦେଇଛି ଘର। ଏବେ ରାଜଧାନୀର ରାସ୍ତାକଡରେ ଜୀବନ କାଟୁଛନ୍ତି ଏହି ଦମ୍ପତିଙ୍କ । ସେଥିପାଇଁ ରାସ୍ତା କଡରେ ରୋଷେଇ, ବସ ଷ୍ଟପରେ ରାତ୍ରି ରହଣି। ଖରା,ବର୍ଷା ଓ ଶୀତ କାକରରେ କଟୁଛି ଏମିତି ଜୀବନ। ଏ ହେଉଛନ୍ତି ଖୋର୍ଦ୍ଧା ସାମନ୍ତରାପୁରର ମିଟୁ ମହାରଣା ଓ ତାଙ୍କ ପତ୍ନୀ ଲକ୍ଷ୍ମୀ ।
ଗତ ଫନି ବାତ୍ୟାରେ ରସୁଲଗଡରେ ରହୁଥିବା ସମୟରେ ବସ୍ତି ଘର ଉଡିଯିବା ଓ ପାଣି ପଶିଯିବା ପରେ ଏବେ ଏମାନେ ହେଉଛନ୍ତି ବାର ଦୁଆର। ଆଶ୍ରୟସ୍ଥଳରୁ ତଡା ଖାଇବା ପରେ ଏବେ ରାସ୍ତାକଡରେ ନେଉଛନ୍ତି ଆଶ୍ରୟ। କାରଣ ଘରଟେ କରିବାକୁ ଆର୍ଥିକ ସମ୍ବଳ କି ସରକାରୀ ସୁବିଧା ସୁଯୋଗ ନାହିଁ। ଯାହାଫଳରେ ଏଜି ଛକ ନିକଟରେ ମନ୍ତ୍ରୀ ଓ ପ୍ରଶାସନିକ ଅଧିକାରିଙ୍କ କ୍ବାଟର ପାଖରେ ରାସ୍ତା ଉପରେ କଟେ ଏହି ଦମ୍ପତୀଙ୍କ ଜୀବନ।
ତେବେ ଏହି ସର୍ବହରାଙ୍କ ପାଖରେ ଆଧାର କାର୍ଡ କି ପରିଚୟ ପତ୍ର ନଥିବାରୁ ସରକାରୀ ସୁବିଧାରୁ ଏମାନେ ବଞ୍ଚିତ। ନିତିଦିନ ସରକାରି ବାବୁ ଓ ନେତା ମନ୍ତ୍ରୀ ଏପରିକି ମୁଖ୍ୟମନ୍ତ୍ରୀ ଉକ୍ତ ବାଟ ଦେଇ ଯିବାଆସିବା କରୁଥିଲେ ବି ସତେ ଯେପରି ଏମାନଙ୍କ ଉପରୁ ସମସ୍ତେ ନଜର ହଟାଇ ଦେଇଛନ୍ତି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
