ଭୁବନେଶ୍ବର: ଗୋଟିଏ ଦିନ ବିରତି ପରେ ଆଜିଠାରୁ ପୁଣି ରାଜ୍ୟରେ ଆରମ୍ଭ ହୋଇଛି କୋଭିଡ ଟୀକାକରଣ କାର୍ଯ୍ୟକ୍ରମ । ଦ୍ବିତୀୟ ଦିନରେ 380 ସେସନ ମାଧ୍ୟମରେ 31 ହଜାର 902 ଜଣଙ୍କୁ ଟୀକାକରଣ ପାଇଁ ଲକ୍ଷ୍ୟ ରଖାଯାଇଛି । ଆଜିଠୁ 25 ତାରିଖ ପର୍ଯ୍ୟନ୍ତ 1,698 ଟି ସେସନରେ 1 ଲକ୍ଷ 78 ହଜାର ସ୍ବାସ୍ଥ୍ୟକର୍ମୀଙ୍କୁ ଟୀକାକରଣ କରାଯିବାକୁ ଲକ୍ଷ୍ୟ ରଖାଯାଇଛି । ଏପଟେ ଆଜି 24 ଟି କେନ୍ଦ୍ରରେ 3,500 କର୍ମୀଙ୍କୁ ଟୀକାକରଣ ପାଇଁ ଲକ୍ଷ୍ୟ ରହିଛି। ଭୁବନେଶ୍ବରକୁ ଆସିଥିବା କୋଭାକ୍ସିନ ଡୋଜ ଅନୁସାରେ ପ୍ରଥମ ପର୍ଯ୍ୟାୟରେ 9,000 ଲୋକଙ୍କୁ ଟିକା ପ୍ରଦାନ କରାଯିବ।
ଏନେଇ 26 ଟି ସରକାରୀ ଓ ଘରୋଇ ହସ୍ପିଟାଲରେ ଟୀକାଦାନ କେନ୍ଦ୍ର ଚିହ୍ନଟ ହୋଇଛି। ଆଜି 24 ଟି କେନ୍ଦ୍ରରେ ଟୀକାକରଣ ଚାଲିଛି। ଆଗକୁ ବାକି ଦୁଇଟି କେନ୍ଦ୍ରରେ ଟୀକାପ୍ରଦାନ କରାଯିବ। 4 ରୁ 5 ଦିନ ଭିତରେ ଟୀକାକରଣ ଶେଷ କରାଯିବାକୁ ଲକ୍ଷ୍ୟ ଥିବା କହିଛନ୍ତି ବିଏମସି କମିଶନର। ପୂର୍ବରୁ 13 ହଜାର 890 ଲୋକଙ୍କୁ ଟୀକାକରଣ କରାଯାଇଥିଲା । କେଉଁଦିନ କେତେ ସେସନରେ ଟୀକାକରଣ ହେବ ତାହା ମଧ୍ୟ ନିର୍ଦ୍ଧାରଣ ହୋଇସାରିଛି ।
- 19 ତାରିଖରେ 192 ଟି ସେସନ
- 20 ତାରିଖରେ 92 ଟି ସେସନ
- 21 ତାରିଖରେ 436 ଟି ସେସନ
- 22 ତାରିଖରେ 141 ଟି ସେସନ
- 23 ତାରିଖରେ 178 ଟି ସେସନ
- 25 ତାରିଖରେ 279 ଟି ସେସନ
ଅନ୍ୟପଟେ ଯେଉଁମାନେ ଯେଉଁଦିନ ଟିକା ନେଇଛନ୍ତି ତାହାର 28 ଦିନ ପରେ ସେକେଣ୍ଡ ଡୋଜ ନେବେ । ସେଥିପାଇଁ ପର୍ଯ୍ୟାପ୍ତ ଟିକା ରହିଛି। ସେହି ସମୟର ଦୁଇ ଦିନ ପୂର୍ବରୁ ଏସଏମଏସ ଦ୍ବାରା ଜଣାଇ ଦିଆଯିବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ ଓ ବିକାଶ କୁମାର ଦାସଙ୍କ ରିପୋର୍ଟ, ଇଟିଭି ଭାରତ
