ହାଇଦ୍ରାବାଦ: କୋରୋନା ରୋଗୀଙ୍କ ପାଇଁ ରାଜ୍ୟ ସରକାରଙ୍କ ଗୁରୁତ୍ବପୂର୍ଣ୍ଣ ସୂଚନା । କୋରୋନା ଆକ୍ରାନ୍ତ ହୋଇଥିବା ରୋଗୀ ଯଦି ଭୁବନେଶ୍ବର କିମ୍ବା କଟକ ଆସୁଛନ୍ତି, ତେବେ ଆବଶ୍ୟକୀୟ ଆନୁଷଙ୍ଗିକ ବ୍ୟବସ୍ଥାରେ ଆସିବାକୁ ଅନୁରୋଧ କରିଛନ୍ତି ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ।
ଆନୁଷଙ୍ଗିକ ବ୍ୟବସ୍ଥା ସହ ଅକ୍ସିଜେନ ସପୋର୍ଟରେ ରାଜଧାନୀ ଭୁବନେଶ୍ବର ଏବଂ କଟକ ଆସିବାକୁ ପରାମର୍ଶ ଦେଇଛନ୍ତି ମୁଖ୍ୟ ଶାସନ ସଚିବ । ଗତ କିଛି ଦିନ ଧରି ରାଜ୍ୟରେ କୋରୋନାର ବିସ୍ଫୋରକ ସ୍ଥିତି ଉପୁଜିଛି । ସେହିପରି କଟକ ଓ ଭୁବନେଶ୍ବରରେ ମଧ୍ୟ କୋଭିଡର ଉତ୍କଟ ସ୍ଥିତି ଉପୁଜିଛି । ତେଣୁ ଏହି ସମୟରେ ସହରକୁ ଆସୁଥିଲେ ସମ୍ପୂର୍ଣ୍ଣ ପ୍ରସ୍ତୁତିର ସହ ଆସିବାକୁ କହିଛନ୍ତି ରାଜ୍ୟ ସରକାର ।
ସେପଟେ ରାଜ୍ୟର ସମସ୍ତ କୋଭିଡ ସେଣ୍ଟର, ଟିଏମସି କେନ୍ଦ୍ରକୁ ବନ୍ଦ କରିବା ପାଇଁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ତେଣୁ ଆଗକୁ ରାଜ୍ୟର କୋଭିଡ ସ୍ଥିତିକୁ ସରକାର କିପରି ମୁକାବିଲା କରିବେ କିମ୍ବା ହାତଟେକି ଦେବେ, ତାହା ବର୍ତ୍ତମାନ ବଡ଼ ପ୍ରଶ୍ନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
