ଭୁବନେଶ୍ବର: ବିଏମ୍ସିର ତିନି ମେୟର ପ୍ରାର୍ଥିନୀଙ୍କ ମଧ୍ୟରୁ ସବୁଠୁ ଧନୀ ବିଜେଡି ପ୍ରାର୍ଥିନୀ ସୁଲୋଚନା ଦାସ । ତାଙ୍କର ମୋଟ ସମ୍ପତ୍ତି ପରିମାଣ ୧ କୋଟି ୮୨ ଲକ୍ଷ ୬୦ ହଜାର ୩୩୮ । ଦିନକ ପରେ ନିର୍ବାଚନ ଥିବାବେଳେ ବିଜେଡିର ଏହି କୋଟିପତି ମେୟର ପ୍ରାର୍ଥିନୀଙ୍କ ସମ୍ପତ୍ତି ଉପରେ ପ୍ରଶ୍ନ ଉଠାଇଛି କଂଗ୍ରେସ । ତାଙ୍କ ନିକଟକୁ ଏତେ ଟଙ୍କା କେଉଁଠୁ ଆସିଲା ? ଏହି ଅର୍ଥ ଚିଟଫଣ୍ଡରୁ ଆସିନି ତ ? ଏନେଇ କଂଗ୍ରେସ ସନ୍ଦେହ କରିବା ସଙ୍ଗେ ସଙ୍ଗେ ସିସୋର ଚିଟଫଣ୍ଡ ଠକେଇ ଘଟଣାରେ ସୁଲୋଚନାଙ୍କ ସମ୍ପର୍କ କ'ଣ ତାହା ସେ ସ୍ପଷ୍ଟ କରନ୍ତୁ ବୋଲି ଦାବି କରିଛି ।
ଆଜି(ମଙ୍ଗଳବାର) ଭୁବନେଶ୍ୱର କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀରେ ଶାସକ ଦଳକୁ ଏପରି ଭାବେ ଟାର୍ଗେଟ କରିଛନ୍ତି କଂଗ୍ରେସ ମୁଖପାତ୍ର ମନୋଜ ମହାପାତ୍ର । ଖବର କାଗଜରେ ଘରେ ଘରେ ଶଙ୍ଖ ପାଇଁ ବିଜ୍ଞାପନ ଦିଆଯାଉଛି । ହେଲେ ଘରେ ଶଙ୍ଖ ବାଜିବା ପୂର୍ବରୁ ବିଜେଡି ମେୟର ପ୍ରାର୍ଥିନୀଙ୍କ ସିସୋର ଚିଟଫଣ୍ଡ ସହ କ'ଣ ଲିଙ୍କ ଅଛି ଏବଂ ଏତେ ଧନୀ ସେ କେମିତି ହେଲେ ତାହା ସ୍ପଷ୍ଟ କରନ୍ତୁ ବୋଲି କଂଗ୍ରେସ କହିଛି ।
ରାଜ୍ୟରେ ଗତ କିଛି ଦିନ ଭିତରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି । ଛୋଟ ପେନଡ୍ରାଇଭ ପାଇଁ ମମିତା ମେହରର ହତ୍ୟା କରାଗଲା । ଏପଟେ ଛୋଟ ଚିପ୍ ପାଇଁ ଜଣେ କ୍ୟାମେରମ୍ୟାନଙ୍କ ଜୀବନ ଗଲା । ହେଲେ ଏହି ଘଟଣାର ମୁଖ୍ୟ ଅଭିଯୁକ୍ତ ୱେବ ଚ୍ୟାନେଲ ମାଲିକାଣି ଶର୍ମିଷ୍ଠାକୁ ପୋଲିସ ଧରି ପାରୁନି ଏବଂ ସେ ହାଇକୋର୍ଟରେ ଆଗୁଆ ଜାମିନ ପାଇଁ ଅପିଲ କରୁଛି । ଶର୍ମିଷ୍ଠାଙ୍କ ସହ ବଡ ବଡ ନେତାଙ୍କ ଫଟୋ ଭାଇରାଲ ହେଉଛି । ଏହି ହତ୍ୟାକାଣ୍ଡ ପଛରେ ଯେଉଁମାନେ ଅଛନ୍ତି ତାହାର ଖୁଲାସା ହେବା ଦରକାର ବୋଲି କଂଗ୍ରେସ ମୁଖପାତ୍ର ଦାବି କରିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
