ଭୁବନେଶ୍ବର: ରାଜ୍ୟରେ ସାଧାରଣ ନିର୍ବାଚନ ହେଉ କି ଉପନିର୍ବାଚନ ସବୁଥିରେ କଂଗ୍ରେସ ଫେଲ ମାରିଛି । ତେବେ ଆଗାମୀ ଦିନରେ ଦଳକୁ ସୁଦୃଢ କରିବା ପାଇଁ କଂଗ୍ରେସ ମୁଖିଆମାନଙ୍କ ଭିତରେ ଏକ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି । ଏହି ଅବସରରେ ଜିଲ୍ଲାସ୍ତରୀୟ କମିଟିକୁ ପୁର୍ନଗଠନ କରାଯିବ ବୋଲି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର ପ୍ରକାଶ କରିଛନ୍ତି ।
ନୂତନ ଭାବରେ ଜିଲ୍ଲା କମିଟି, ବ୍ଲକ ସ୍ତରରେ ପିସିସି କମିଟି ଗଠନ କରାଯିବ । ଏହା ସହିତ ଜିଲ୍ଲା ସଭାପତିଙ୍କୁ ନିଯୁକ୍ତି ଦିଆଯିବ । ଆସନ୍ତା ନଭେମ୍ବର ମାସ ୭ ତାରିଖ ସୁଦ୍ଧା ଏ ସଂକ୍ରାନ୍ତୀୟ ରିପୋର୍ଟ ପ୍ରଦାନ କରିବାକୁ କୁହାଯାଇଛି । ଜିଲ୍ଲା ଓ ବ୍ଲକ ସ୍ତରରେ କିଏ କେଉଁ ଭଳି ଲୋକମାନଙ୍କ ସହ ସହଯୋଗ ରଖୁଛି ସେନେଇ ମଧ୍ୟ ନଜର ରଖିବେ କଂଗ୍ରେସ ସଭାପତି । କାମ ଆଧାରରେ ସ୍ଥାନୀୟ ନେତା ମାନଙ୍କୁ ନୂତନ କମିଟିରେ ସାମିଲ କରାଯିବ ବୋଲି ନରସିଂହ ମିଶ୍ର ପ୍ରକାଶ କରିଛନ୍ତି ।
କଂଗ୍ରେସର ପ୍ରଦେଶ କମିଟି ଓ ଜିଲ୍ଲା କମିଟିକୁ କିଛି ବର୍ଷ ପୂର୍ବରୁ ଭାଙ୍ଗି ଦିଆଯାଇଛି । ତେଣୁ ବର୍ତ୍ତମାନ ପ୍ରଦେଶ କଂଗ୍ରେସ ସଭାପତି ଓ ଦୁଇ ଜଣ କାର୍ଯ୍ୟକାରୀ ପ୍ରଦେଶ ସଭାପତି ରହିଥିବା କଥା ବରିଷ୍ଠ କଂଗ୍ରେସ ନେତା କହିଛନ୍ତି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
