ଭୁବନେଶ୍ବର: ପୋଲିସ କମିଶନର ଭାବେ ନୂଆ କରି ଦାୟିତ୍ବ ନେଇଛନ୍ତି ସୁଧାଂଶୁ ଷଡ଼ଙ୍ଗୀ । କିନ୍ତୁ ଆରମ୍ଭରୁ ହିଁ ଶୃଙ୍ଖଳା ଏବଂ ସୁରକ୍ଷା ବ୍ୟବସ୍ଥାକୁ ନିୟନ୍ତ୍ରଣ କରିବା ଚ୍ୟାଲେଞ୍ଜ ପାଲଟିଛି । ଏହାର ପ୍ରମୁଖ କାରଣ ସାଜିଛି ଆବଶ୍ୟକୀୟ ପୋଲିସ ଅଭାବ । ଦ୍ବୈତ ନଗରୀ ପାଇଁ ଯେଉଁ ପରିମାଣର ପୋଲିସ କର୍ମଚାରୀ ଆବଶ୍ୟକ । ତାହାର ଅଭାବ ଦେଖିବାକୁ ମିଳିଛି କମିଶନର ପୋଲିସ ପାଖରେ । ଫଳରେ ନୂଆ ପୋଲିସ କମିଶନରଙ୍କ ପାଇଁ ଆରମ୍ଭ ହୋଇଛି ନୂଆ ଚ୍ୟାଲେଞ୍ଜ ।
ଲୋ ପୋଲିସ ମ୍ୟାନ ପାୱାର ଫଳରେ ଆଇନଶୃଙ୍ଖଳା ଓ ଅପରାଧ ନିୟନ୍ତ୍ରଣ ଏକ ପ୍ରକାର ମୁଣ୍ଡବ୍ୟଥାର କାରଣ ସାଜିଛି । ବର୍ତ୍ତମାନ 188 ଜଣ ଏସଆଇଙ୍କ ସ୍ଥାନରେ ଅଛନ୍ତି 128 ଜଣ । ସେହିପରି 180ଜଣ ଏଏସଆଇରୁ ଅଛନ୍ତି 152ଜଣ । କଟକ-ଭୁବନେଶ୍ବର ଦ୍ବୈତ ନଗରୀ ପାଇଁ 186 ହାବିଲଦାରଙ୍କ ଆବଶ୍ୟକତା ରହିଥିବାବେଳେ ବର୍ତ୍ତମାନ କାର୍ଯ୍ୟନିର୍ବାହ କରୁଛନ୍ତି 168 ଜଣ ।
ସେହିପରି 1562 କନଷ୍ଟେବଳଙ୍କ କାର୍ଯ୍ୟ କରୁଛନ୍ତି 1446 ଜଣ । ସମୁଦାୟ 26 ଜଣ ଏସିପିଙ୍କ ଆବଶ୍ୟକତା ରହିଥିବାବେଳେ 22 ଜଣ ରହିଛନ୍ତି । 60 ଜଣ ଇନସ୍ପେକ୍ଟର , 11 ଆଡିସିନାଲ ଡିସିପି ଓ 2 ଜଣ ଡିସିପି ଦ୍ବୈତ ନଗରୀ ପାଇଁ ଦାୟିତ୍ବରେ ରହିଛନ୍ତି । ଆଗକୁ ଗଣେଷ ପୂଜା ଓ ଦଶହରା ରହିଥିବାବେଳେ ସହରରରେ ଶାନ୍ତି ଶୃଙ୍ଖଳା ଓ ସୁରକ୍ଷାକୁ ନିୟନ୍ତ୍ରଣ କରିବା ପୋଲିସ ପାଇଁ ଏକ ବଡ଼ ସମସ୍ୟା ହୋଇ ଉଭା ହୋଇଛି । ଏହା ସହ ବିଧାନସଭା, ଅନ୍ତର୍ଜାତୀୟ ସ୍ତରର ବିଭିନ୍ନ ଖେଳ, ଅନେକ ରାଜନୈତିକ କାର୍ଯ୍ୟକ୍ରମ ପାଇଁ ମଧ୍ୟ ବ୍ୟାପକ ପୋଲିସ ମୁତୟନ ହେଉଛନ୍ତି । ତେଣୁ ନୂତନ କମିଶନର ଏଭଳି ସ୍ଥିତିରେ କିପରି ଚ୍ୟାଲେଞ୍ଜକୁ ସାମ୍ନା କରୁଛନ୍ତି ତାହା ହିଁ ମୁଖ୍ୟ ବିଷୟ ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
