ଭୁବନେଶ୍ବର: ଦ୍ରୌପଦୀ ମୁର୍ମୁଙ୍କୁ ଏନଡିଏ ରାଷ୍ଟ୍ରପତି ପ୍ରାର୍ଥୀ କରିଛି । ବିଜେଡି ଦ୍ରୌପଦୀଙ୍କ ପ୍ରାର୍ଥୀତ୍ବକୁ ସମର୍ଥନ କରୁଥିବା ଏକପ୍ରକାର ସ୍ପଷ୍ଟ ହୋଇଛି । ଦ୍ରୌପଦୀଙ୍କୁ ବିଜେଡିର ସମର୍ଥନ ନେଇ ମୁଖ୍ୟମନ୍ତ୍ରୀ ଟ୍ୱିଟରରେ ସ୍ପଷ୍ଟ ବାର୍ତ୍ତା ଦେଇଛନ୍ତି ବୋଲି ବିଜେଡି ସାଂସଦ ଅମର ପଟ୍ଟନାୟକ କହିଛନ୍ତି ।
ଦ୍ରୌପଦୀଙ୍କ ପ୍ରାର୍ଥୀତ୍ବକୁ ବିଜେଡି ସମର୍ଥନ ଦେବ ବୋଲି ପରୋକ୍ଷରେ ବିଜେଡି ସାଂସଦ ଅମର ପଟ୍ଟନାୟକ ସଙ୍କେତ ଦେଇଛନ୍ତି । ଅମର କହିଛନ୍ତି ଯେ, "ମୁଖ୍ୟମନ୍ତ୍ରୀ ଏବେ ବିଦେଶ ଗସ୍ତରେ ଅଛନ୍ତି । କିନ୍ତୁ ମୁଖ୍ୟମନ୍ତ୍ରୀ ଟ୍ୱିଟ୍ରେ କହିଛନ୍ତି ଯେ, ଏହା ଓଡ଼ିଶା ପାଇଁ ଗର୍ବ । ପ୍ରଧାନମନ୍ତ୍ରୀ ତାଙ୍କ ସହ ଏ ବିଷୟରେ ପୂର୍ବରୁ ଆଲୋଚନା କରିଥିଲେ । ସେଥିପାଇଁ ସେ ବହୁତ ଖୁସି । ତେଣୁ ମୁଖ୍ୟମନ୍ତ୍ରୀଙ୍କ ଟ୍ୱିଟ ଯାହା ସନ୍ଦେଶ ଦେଉଛି, ଆପଣମାନେ ଯାହା ଆକଳନ କରୁଛନ୍ତି, ତାହା ସତ । ଆପଣମାନଙ୍କ ଆକଳନରେ କିଛି ଭୁଲ ନାହିଁ । ଏହାର ଅର୍ଥ ବିଜେଡି ଦ୍ରୌପଦୀଙ୍କ ପ୍ରାର୍ଥୀତ୍ବକୁ ସମର୍ଥନ ଦେବ ।
ଜାତୀୟ ରାଜନୀତିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭୂମିକା ସବୁ କ୍ଷେତ୍ରରେ ରହିଆସୁଛି । ଯେକୌଣସି ପ୍ରମୁଖ ବିଲ୍ରେ ମୁଖ୍ୟମନ୍ତ୍ରୀଙ୍କ ସମର୍ଥନକୁ ବିଜେପି ସବୁବେଳେ ଚାହୁଁଛି । ପ୍ରଧାନମନ୍ତ୍ରୀ ଏଥର ବି ସମର୍ଥନ ଲୋଡ଼ିଛନ୍ତି । ଆଦିବାସୀଙ୍କର କିଭଳି ଉନ୍ନତି ହୋଇପାରିବ, ସେ ବିଷୟରେ ମୁଖ୍ୟମନ୍ତ୍ରୀ କହି ଆସିଛନ୍ତି । ରାଷ୍ଟ୍ରପତି ପ୍ରାର୍ଥୀ ଚୟନ ନେଇ ଯେଉଁଭଳି ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀଙ୍କ ସହ କଥାବାର୍ତ୍ତା ହୋଇଥିଲେ, ଏଥିରୁ ଜାତୀୟ ସ୍ତରରେ ନବୀନଙ୍କର କିଭଳି ପ୍ରଭାବ ରହୁଛି, ତାହା ବାରି ହୋଇ ପଡ଼ୁଛି । ମୁଖ୍ୟମନ୍ତ୍ରୀ ସବୁବେଳେ କହିଛନ୍ତି ମହିଳା ବିକାଶର ଡବଲ ଇଞ୍ଜିନ । ଏଥିପାଇଁ ମହିଳାଙ୍କୁ ଆଗରେ ରଖିଛନ୍ତି । ତେଣୁ ମହିଳା ପ୍ରାର୍ଥୀ ଚୟନ ନେଇ ମଧ୍ୟ ମୁଖ୍ୟମନ୍ତ୍ରୀଙ୍କ ଭୂମିକା ଥାଇପାରେ ବୋଲି ଅମର ପରୋକ୍ଷରେ ସୂଚନା ଦେଇଛନ୍ତି ।
