ଭୁବନେଶ୍ବର: ବିଦ୍ୟୁତ ଚୋରି ରୋକିବାକୁ ସେସୁର ପଦକ୍ଷେପ । ବିଦ୍ୟୁତ ଚୋରି ସଂକ୍ରାନ୍ତରେ ଖବର ଦେଲେ ମିଳିବ ପୁରସ୍କାର । ଖବରଦାତାଙ୍କୁ ଆଦାୟ ହୋଇଥିବା ଫାଇନ ଅର୍ଥର 10 ପ୍ରତିଶତ ମିଳିବ । 10 ପ୍ରତିଶତ ବିଜୁଳି ଚୋରି ପାଇଁ 90 ପ୍ରତିଶତ ଲୋକ ପ୍ରଭାବିତ ହେଉଛନ୍ତି। ଏହାସହ ସେସୁ ବି 30 ପ୍ରତିଶତ କ୍ଷତି ସହୁଛି । ତେଣୁ ଏହି ଚୋରି ରୋକିବା ପାଇଁ ଆସନ୍ତା 3 ମାସ ମଧ୍ୟରେ ବଡ ଧରଣର ଚଢାଉ ହେବ ବୋଲି ଜଣାପଡିଛି ।
ଏହାସହ ଆଗାମୀ ଦିନରେ ବିଲ ସଂଗ୍ରହ, ଇ ପେମେଣ୍ଟ ଭଳି କାର୍ଯ୍ୟରେ ସ୍ବୟଂ ସହାୟକ ଗୋଷ୍ଠୀର ମହିଳାଙ୍କୁ ସାମିଲ କରାଯିବ । ଗାଁରେ ସେସୁର ନେଟୱାର୍କ ବଢାଇବାକୁ ଉଦ୍ୟମ କରାଯାଉଛି । ବିଲ ସଂଗ୍ରହ ଓ ଚଢାଉ ପାଇଁ ଅଧିକାରୀଙ୍କୁ ଟାର୍ଗେଟ ମଧ୍ୟ ଦିଆଯାଇଛି ।
ସେହିପରି ଉପଭୋକ୍ତା ସୋସିଆଲ ମିଡିଆରେ ଅଭିଯୋଗ କରିବାର ବ୍ୟବସ୍ଥା କରାଯାଉଛି । 1912 ଓ 06742391110ରେ ମଧ୍ୟ ଉପଭୋକ୍ତା ଅଭିଯୋଗ କରିପାରିବେ। ଏଥିସହ ବିଜୁଳି ଚୋରି ବାବଦରେ ଅବଗତ କରାଇବା ପାଇଁ 9437158670 ନମ୍ଵର ଜାରି କରାଯାଇଛି । ସୂଚନା ଦେଇଥିବା ବ୍ୟକ୍ତିଙ୍କ ନାମ ଗୋପନ ରଖାଯିବ ବୋଲି ଜଣାପଡିଛି । ଏନେଇ ଆକ୍ସନ ପ୍ଲାନର ସମୀକ୍ଷା କରିଛନ୍ତି ସେସୁ ସିଇଓ ଅରୁଣ ବୋଥ୍ରା।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
