ଭୁବନେଶ୍ବର: ବୁଲବୁଲ କ୍ଷତିଗ୍ରସ୍ତ ଅଞ୍ଚଳ ବୁଲିବା ପରେ ମୁଖ୍ୟ ଶାସନ ସଚିବଙ୍କ ସହ କେନ୍ଦ୍ରୀୟ ଟିମ ଆଲୋଚନା କରିଛନ୍ତି । ବୁଲବୁଲ କ୍ଷତିଗ୍ରସ୍ତ ଅଞ୍ଚଳ ବୁଲି କ୍ଷୟକ୍ଷତି ଆକଳନ କରିବା ପରେ କେନ୍ଦ୍ରୀୟ ଟିମ ମୁଖ୍ୟ ଶହେଲି ଘୋଷ ରଏ କହିଛନ୍ତି ଯେ, କୃଷିକ୍ଷେତ୍ରରେ ବ୍ୟାପକ କ୍ଷୟକ୍ଷତି ହୋଇଛି । ଏହା ସହ ଭିତ୍ତିଭୂମି ଓ ବିଦ୍ୟୁତ ସହ ରାସ୍ତାର ବି କ୍ଷୟକ୍ଷତି ହୋଇଛି । ଏନେଇ କେନ୍ଦ୍ର ସରକାରଙ୍କୁ ରିପୋର୍ଟ ଦେବୁ । ରାଜ୍ୟ ସରକାରଙ୍କ ରିପୋର୍ଟକୁ ଅପେକ୍ଷା କରିଛୁ ବୋଲି ସେ କହିଛନ୍ତି ।
ଦୁଇଦିନ ଗସ୍ତ କରି ବୁଲବୁଲ କ୍ଷତିଗ୍ରସ୍ତ ଅଞ୍ଚଳ ପରେ କେନ୍ଦ୍ରୀୟ ଟିମ ଏହି ପ୍ରତିକ୍ରିୟା ଦେଇଛନ୍ତି । ଭଦ୍ରକ ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଥିବା ଟିମ କହିଛି । ଭଦ୍ରକର ବାସୁଦେବପୁର, ବାଲେଶ୍ବର ଓ କେନ୍ଦ୍ରାପଡା ଏହାସହ ଜଗତସିଂହପୁର ଜିଲ୍ଲା ପରିଦର୍ଶନ କରିବା ପରେ ଧାନ ଫସଲ ବିଶେଷ କ୍ଷୟକ୍ଷତି ହୋଇଥିବା ଜଣାପଡିଛି ।
ପାଖାପାଖି ୨ଲକ୍ଷ ହେକ୍ଟରର ୩୫ ପ୍ରତିଶତ କ୍ଷତି ହୋଇଛି । ଏହାସହ ବିଦ୍ୟୁତ, ଘରର କ୍ଷତି ସମ୍ବନ୍ଧୀୟ ଏହାର ବିସ୍ତୃତ ରିପୋର୍ଟ ଆସିବା ପରେ ପଞ୍ଚାୟତ ଅଫିସରେ ତାଲିକା ଲଗାଯିବ। କେବଳ ଏତିକି କ୍ଷୟକ୍ଷତି ସମ୍ପର୍କିତ ସମସ୍ତ ତଥ୍ୟ ଜିଲ୍ଲାର ଓ୍ଵେବସାଇଟରେ ପ୍ରଦର୍ଶିତ କରାଯିବ । କୃଷି ଓ ଅର୍ଥ ବିଭାଗ ପକ୍ଷରୁ ଜଏଣ୍ଟ ଇନକ୍ବାରୀ କରାଯିବ । ରିପୋର୍ଟ ଆସିବା ପରେ ମେମୋରେଣ୍ଡମ ଦିଆଯିବ ବୋଲି ସୂଚନା ରହିଛି।
ରାଜ୍ୟ ସରକାରଙ୍କ କାର୍ଯ୍ୟକୁ ପ୍ରଶଂସା କରିଛନ୍ତି କେନ୍ଦ୍ରୀୟ ଟିମ । ରିପୋର୍ଟ ଆସିବା ପରେ କେନ୍ଦ୍ରୀୟ ଟିମ ଚାହିଁଲେ ଆଉଥରେ ଆସି ତଦନ୍ତ କରିପାରିବେ ବୋଲି ସୂଚନା ରହିଛି। ଆସନ୍ତା ସପ୍ତାହରେ ରିପୋର୍ଟ ଦିଆଯିବ ବୋଲି ସୂଚନା ଦେଇଛନ୍ତି ଏସଆରସି ପ୍ରଦୀପ ଜେନା । ଏହି ସମୀକ୍ଷା ବୈଠକରେ ଏସଆରସି ପ୍ରଦୀପ ଜେନା, କୃଷି ସଚିବ ସୌରଭ ଗର୍ଗ, ଶକ୍ତି ସଚିବ ବିଷ୍ଣୁ ସେଠୀ ପ୍ରମୁଖ ଉପସ୍ଥିତ ଅଛନ୍ତି।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
