ଭୁବନେଶ୍ବର: ବାତ୍ୟା ଫନି ପୁନରୁଦ୍ଧାର ପାଇଁ ଓଡିଶାକୁ ମିଳିଲା ଅତିରିକ୍ତ କେନ୍ଦ୍ରୀୟ ସହାୟତା । ରାଜ୍ୟକୁ ଏନେଇ ମିଳିଛି 3338.22 କୋଟି ଟଙ୍କାର କେନ୍ଦ୍ରୀୟ ସହାୟତା । ଗୃହମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ କମିଟିରେ ଏହି ଅନୁଦାନକୁ ଅନୁମୋଦନ ମିଳିଛି ।
ସୂଚନା ଅନୁଯାୟୀ ପୂର୍ବରୁ ବାତ୍ୟା କ୍ଷୟକ୍ଷତି ବାବଦରେ 5227.68 କୋଟି ଟଙ୍କା ମାଗିଥିଲେ ରାଜ୍ୟ ସରକାର । ତେବେ ମଙ୍ଗଳବାର ବାତ୍ୟା ଫନିର ପୁନରୁଦ୍ଧାର ପାଇଁ ଏହି ସହାୟତା ଦେଇଛି କେନ୍ଦ୍ର । ଜାତୀୟ ବିପର୍ଯ୍ୟୟ ରିଲିଫ ପାଣ୍ଠିରୁ ଏହି ସହାୟତା ପ୍ରଦାନ କରାଯାଇଛି । ଏନେଇ ସୂଚନା ଦେଇଛନ୍ତି ସ୍ବତନ୍ତ୍ର ରିଲିଫ କମିଶନର ।
ପ୍ରକାଶ ଯେ ବାତ୍ୟା ଫନିରେ ରାଜ୍ୟର ମୋଟ 24,176 କୋଟି ଟଙ୍କାର କ୍ଷୟକ୍ଷତି ହୋଇଥିବା ଆକଳନ କରାଯାଇଥିଲା । ଯାହାର ପୁନରୁଦ୍ଧାର ପାଇଁ 29,315 କୋଟି ଟଙ୍କାର ଆବଶ୍ୟକତା ରହିଛି । ଏନେଇ ପୂର୍ବରୁ ବାତ୍ୟା ସମୟରେ କେନ୍ଦ୍ର ସରକାର 341 କୋଟି ଟଙ୍କାର ସହାୟତା ଯୋଗାଇଥିବା ବେଳେ ବାତ୍ୟା ପରବର୍ତ୍ତୀ ସ୍ଥିତି ସମୀକ୍ଷା କରି ପ୍ରଧାନମନ୍ତ୍ରୀ ଦେଇଥିଲେ 1 ହଜାର କୋଟି ଟଙ୍କା । ଯାହାକି ରାଜ୍ୟ ସରକାରଙ୍କୁ ମିଳି ସାରିଥିବା ଜଣା ପଡିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
