ଭୁବନେଶ୍ବର: ଦିନକୁ ଦିନ ବଢିବାରେ ଲାଗିଛି ସଡକ ଦୁର୍ଘଟଣା । ସେ ବେପରୁଆ ଗାଡି ଚାଳନା ହେଉ କିମ୍ବା ଅନ୍ୟମନସ୍କତା । ଅକାରଣେ ଚାଲି ଯାଉଛି ଅନେକ ଜୀବନ କିମ୍ବା ପରିବାର ଉପରକୁ ମାଡି ଆସୁଛି ବିବାଦ । ଏପଟେ ରାଜଧାନୀରେ ଶନିବାର ଘଟିଛି ସଡକ ଦୁର୍ଘଟଣା । ଏକକାଳୀନ ମୁହାଁମୁହିଁ ହୋଇଛନ୍ତି କାର, ବାଇକ ଓ ଅଟୋ ।
ଆଚାର୍ଯ୍ୟବିହାର ଛକରେ ଘଟିଥିବା ଏହି ଦୁର୍ଘଟଣାରେ କାରରେ ଥିବା ସ୍ବାମୀ, ସ୍ତ୍ରୀ ଓ ଛୋଟ ଶିଶୁ ଗୁରୁତର ହୋଇଛନ୍ତି । ଅନ୍ୟପଟେ ବାଇକରେ ଥିବା ଦୁଇ ଜଣଙ୍କ ଅବସ୍ଥା ମଧ୍ୟ ଗୁରୁତର ହେବାର ସହ ଅଟୋ ଚାଳକ ଆହତ ହୋଇଛି । ସମସ୍ତ ଆହତଙ୍କୁ ଉଦ୍ଧାର କରାଯାଇ ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
ଛକଠାରୁ ମାତ୍ର 50 ମିଟର ଦୂରରେ ଘଟିଥିବା ଏହି ଦୁର୍ଘଟଣା ରାଜଧାନୀବାସୀଙ୍କୁ ଭୟଭୀତ କରାଇଛି । ଘଟଣା ସମ୍ପର୍କରେ ଖବର ପାଇ ପୋଲିସ ପହଞ୍ଚି ସମସ୍ତ ଆହତଙ୍କୁ ଡାକ୍ତରଖାନା ପଠାଇଛି । ତେବେ କାରଟି ଝାଡଖଣ୍ଡର JH05BP0216 ହୋଇଥିବା ବେଳେ ବାଇକଟି OR02W6414 ଓ ଅଟୋଟି OD33B8627 ହୋଇଥିବା ଜଣାପଡିଛି । ଅନ୍ୟପଟେ ଦୁର୍ଘଟଣା କେଉଁ କାରଣରୁ ହୋଇଛି ତାହା ସ୍ପଷ୍ଟ ହୋଇ ପାରିନାହିଁ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
