ଭୁବନେଶ୍ବର: ରାଜଧାନୀରେ ବ୍ୟାପିଛି ସାଇବର କ୍ରାଇମ ଭୟ । ଦିନକୁ ଦିନକୁ ଯୁଗ ଯେତିକି ଡିଜିଟାଲ ହେଉଛି ସେତିକି ବଢିବାରେ ଲାଗିଛି ସାଇବର କ୍ରାଇମର ପରିମାଣ । ତେବେ ଏହି ସାଇବର କ୍ରାଇମର ଘେରରେ ଏବେ ଆସିଛନ୍ତି ରାଜଧାନୀବାସୀ । ରାତାରାତି ସ୍ବାପ ହେଉଛି ସିମ କାର୍ଡ ଏବଂ ଚୋରି ହେଉଛି ବ୍ୟକ୍ତିଗତ ତଥ୍ୟ ।
ଏସଯେଏଲ ନାମକ ଏକ ସଂସ୍ଥାର ମୁଖ୍ୟ ଥିବା ଜ୍ୟୋତି ରଞ୍ଜନ ଏନେଇ ଆଣିଛନ୍ତି ଅଭିଯୋଗ । ତାଙ୍କ କହିବା ମୁତାବକ ଶନିବାର ସକାଳେ ହଠାତ୍ ତାଙ୍କ ମୋବାଇଲର ନେଟୱାର୍କ ଉଡିଯାଇଥିଲା । ହେଲେ ବନ୍ଧୁ ଓ ପରିବାରବର୍ଗଙ୍କ କହିବା ମୁତାବକ ତାଙ୍କ ନମ୍ବରକୁ କଲ ଗଲେ କେହି କିଛି ନକହି କଲ କାଟି ଦେଉଛନ୍ତି । ସନ୍ଦେହ କରି ଜ୍ୟୋତି ବିଏସ୍ଏନଏଲ ଅଫିସ ସହ ଧଉଳି ଥାନାର ସାଇବର ସେଲରେ ଖବର କରିଥିଲେ ।
ତେବେ ତଦନ୍ତରୁ ଜଣା ପଡିଥିଲା କି ଜ୍ୟୋତିଙ୍କ ସିମ୍ ସ୍ବାପ କରାଯାଇଛି । ଅର୍ଥାତ ଜ୍ୟୋତିଙ୍କ ନାମ ଓ ବ୍ୟକ୍ତିଗତ ତଥ୍ୟରେ ସିମ୍ କାର୍ଡଟି ରେଜିଷ୍ଟର ଥିଲେ ମଧ୍ୟ ଅପରାଧି ସ୍ବାପ କରି ସିମ୍କୁ ବ୍ୟବହାର କରୁଛି । ଏହାଦ୍ବାରା ବ୍ୟାଙ୍କରୁ ଟଙ୍କା ମଧ୍ୟ ଚୋରି ହେବାର ଆଶଙ୍କା ରହିଛି ।
ତେବେ କିଛି ସାଇବାର ଅପରାଧିଙ୍କ ଯୋଗୁଁ ବିନା ଆଧାର କାର୍ଡରେ ଅନ୍ୟର ସିମ୍ କାର୍ଡକୁ ବ୍ୟବହାର କରି ସମସ୍ତ ବ୍ୟକ୍ତିଗତ ତଥ୍ୟ ଚୋରି ହୋଇଥାଏ । ଫଳରେ ବ୍ୟାଙ୍କରୁ ଟଙ୍କା ଗାଏବ ପରି ଘଟଣା ସାମ୍ନାକୁ ଆସୁଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
