ଭୁବନେଶ୍ବର: ଆବାସ ଯୋଜନାରେ ଦୁର୍ନୀତିଠୁ ନେଇ ମମିତା ମେହେର ହତ୍ୟାକାଣ୍ଡରେ (Mamita Meher murder case) ମୁହାଁମୁହିଁ ହେଉଛନ୍ତି ଶାସକ ଓ ବିରୋଧୀ ଦଳ । ମମିତା ମେହେର ହତ୍ୟାକାଣ୍ଡ ନେଇ ବିଜେପି ଏକ ସାମ୍ବାଦିକ ସମ୍ମିଳନୀ(BJP Pressmeet) କରି ବିଜେଡି ଉପରେ ବର୍ଷିଛି । ବିଧାନସଭା ଆରମ୍ଭ ହୋଇଯାଇଛି ସରକାରଙ୍କ ମୁଣ୍ଡ ଉପରେ ଖଣ୍ଡା ଝୁଲୁଛି । ଚୋରି ପୁଣି ସିନା ଜୋରି କରୁଛି ଶାସକ ଦଳ ବୋଲି କହିଛନ୍ତି ବିଜେପି ସାଧାରଣ ସମ୍ପାଦକ ଗୋଲକ ମହାପାତ୍ର ।
ମମିତା ମେହେର ଘଟଣାରେ ମନ୍ତ୍ରୀ ଦିବ୍ୟଶଙ୍କରଙ୍କ ସଂପୃକ୍ତି ନେଇ ବିଧାନସଭା ଭିତରେ ବିଜେପି ସରକାରଙ୍କୁ ଘେରୁଛି। ତାକୁ ଏଡାଇବା ପାଇଁ ଆଜି ବିଜେଡ଼ି ନାଟକ କରୁଛି। ପ୍ରଧାନମନ୍ତ୍ରୀ ଆବାସ ଯୋଜନାରେ ପ୍ରାୟ 1 ହଜାର କୋଟି ଟଙ୍କାର ଦୁର୍ନୀତି ହୋଇଛି । ଯୋଗ୍ୟ ହିତାଧିକାରୀଙ୍କୁ ମିଳିନି ଘର । ଯୋଗ୍ୟଠୁ ଅଯୋଗ୍ୟ ହିତାଧିକାରୀଙ୍କ ସଂଖ୍ୟା ଅଧିକ । ୯ଟି ଜିଲ୍ଲାବାସୀ ଏଯାଏଁ ଖଣ୍ଡିଏ ଘର ପାଇ ନାହାନ୍ତି । କାହିଁକି ଏପରି ହୋଇଛି ବୋଲି ଜବାବ ମାଗିଛି ବିଜେପି । କେନ୍ଦ୍ରୀୟ ଟିମ ତଦନ୍ତ ରିପୋର୍ଟରୁ ଏହା ସ୍ପଷ୍ଟ ହୋଇଛି । କେନ୍ଦ୍ରକୁ କଂପ୍ଲାଏ ରିପୋର୍ଟ ଦେଉନି ଶାସକ ଦଳ।
