ଭୁବନେଶ୍ବର: ରାଜଧାନୀର ଆଇନ ଶୃଙ୍ଖଳାକୁ ନେଇ ବର୍ଷିଲା ବିଜେପି । ଭୁବନେଶ୍ବରରେ ଯେତେସବୁ ହିସାଂକାଣ୍ଡ ଘଟୁଛି ସବୁଥିରେ ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କ ହାତ ରହିଛି । ମଙ୍ଗଳବାର ଏମିତି ସାଂଘାତିକ ଅଭିଯୋଗ ଆଣିଛି ବିଜେପି । ଦଳୀୟ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏମିତି ଅଭିଯୋଗ ଆଣିଛନ୍ତି ବିଜେପି ନେତା ଜଗନ୍ନାଥ ପ୍ରଧାନ ।
ଜଗନ୍ନାଥ ଅଭିଯୋଗ କରିଛନ୍ତି ଜାନୁଆରୀ ୧୦ରେ ମାର୍କେଟ ବିଲଡିଂରେ ସ୍ଥାନୀୟ ଯୁବକଙ୍କ ଗୁଣ୍ଡାରାଜ ହେଉ ଅବା ୧୪ ତାରିଖରେ ଶିଖ ବ୍ୟବସାୟୀଙ୍କୁ ମରଣାନ୍ତକ ଆକ୍ରମଣ । ସବୁଥିରେ ବିଧାୟକ ଅନନ୍ତ ନାରାୟଣ ଜେନାଙ୍କ ପ୍ରଛନ୍ନ ହାତ ରହିଛି ବୋଲି ସେ ସାଂଘାତିକ ଅଭିଯୋଗ ଆଣିଛନ୍ତି । ରାଜଧାନୀରେ ସରକାରୀ ଦଳର କର୍ମୀମାନେ ଗୁଣ୍ଡାରାଜ ଚଳାଇଛନ୍ତି । ମାର୍କେଟ ବିଲଡିଂ ମାମଲାର ମୁଖ୍ୟ ଅଭିଯୁକ୍ତ ସ୍ମୃତି ସାଗର ମହାପାତ୍ର ହେଉଛନ୍ତି ବିଧାୟକ ଅନନ୍ତ ଜେନାଙ୍କ ପାଖ ଲୋକ । ପ୍ରମାଣ ସ୍ବରୂପ ବିଜେପି ବିଧାୟକ ଓ ଅଭିଯୁକ୍ତଙ୍କ ବିଭିନ୍ନ ଫଟୋ ଜାରି କରିଛି ।
ବିଜେପି ନେତା ଜଗନ୍ନାଥ ପ୍ରଧାନ ଦାବି କରିଛନ୍ତି ମୁଖ୍ୟମନ୍ତ୍ରୀ ଏହି ଘଟଣାରେ ହସ୍ତକ୍ଷେପ କରିବା ସହ ବିଧାୟକ ଅନନ୍ତ ଜେନାଙ୍କୁ ଦଳରୁ ବହିଷ୍କାର ଏବଂ ଶିଖ ଯୁବକ ଆକ୍ରମଣ ଘଟଣାରେ ଏସିପି ଅନୁପ କାନୁନଗୋଙ୍କୁ ଚାକିରିରୁ ବହିଷ୍କୃତ କରିବାକୁ ଦାବି କରିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
