ଭୁବନେଶ୍ବର: କଳାହାଣ୍ଡି ମହାଲିଙ୍ଗ ଶିକ୍ଷୟିତ୍ରୀ ମମିତା ମେହେର ହତ୍ୟା ଘଟଣାରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ନାମରେ ଏତଲା ଦେଲା ବିଜେପି। ମନ୍ତ୍ରୀଙ୍କୁ ତଦନ୍ତ ପରିସରଭୁକ୍ତ କରିବା ଓ ତୁରନ୍ତ ଗିରଫ ଦାବିରେ ଭୁବନେଶ୍ବର ସାଙ୍ଗଠନିକ ଜିଲ୍ଲା ବିଜେପି ପକ୍ଷରୁ କ୍ୟାପିଟାଲ ଥାନାରେ ଏତଲା ଦିଆଯାଇଛି । ମୃତ ଶିକ୍ଷୟିତ୍ରୀଙ୍କ ପରିବାର ସଦସ୍ୟଙ୍କ ଅଭିଯୋଗ ଅନୁସାରେ ମନ୍ତ୍ରୀଙ୍କ ନାମରେ ଏହି ଏତଲା ଦାୟର କରାଯାଇଥିବା କହିଛି ଦଳ । ଏହା ସହ ଘଟଣା ତଦନ୍ତ ଭାର CBIକୁ ହସ୍ତାନ୍ତର କରିବା ପାଇଁ ମଧ୍ୟ ଦଳ ଦାବି କରିଛି ।
ଆଜି ଦଳର ମହିଳା ମୋର୍ଚ୍ଚା ସଦସ୍ୟଙ୍କ ସହ ଅନ୍ୟ କର୍ମୀମାନେ ଶୋଭାଯାତ୍ରାରେ ଆସି କ୍ୟାପିଟାଲ ଥାନରେ ପହଞ୍ଚିଥିଲେ । ଏତଲା ଦେବା ପରେ ମୁଖ୍ୟମନ୍ତ୍ରୀ ଦୋଷୀଙ୍କୁ ଘଣ୍ଟ ଘୋଡାଉଥିବା ଅଭିଯୋଗ କରି ନାରାବାଜୀ କରିବା ସହ ଖୁବଶୀଘ୍ର ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ ବିଜେପି କାର୍ଯ୍ୟକର୍ତ୍ତା । ଆଜିର ଏହି କାର୍ଯ୍ୟକ୍ରମ ଦଳର ଭୁବନେଶ୍ୱର ସାଙ୍ଗଠନିକ ଜିଲ୍ଲା ସଭାପତି ବାବୁ ସିଂଙ୍କ ନେତୃତ୍ବରେ କରାଯାଇଥିଲା।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
