ଭୁବନେଶ୍ବର: ଆଗକୁ ଆସୁଛି ରାଷ୍ଟ୍ରପତି ନିର୍ବାଚନ, କିଏ ହେବ ପରବର୍ତ୍ତୀ ରାଷ୍ଟ୍ରପତି ତାକୁ ନେଇ ଆରମ୍ଭ ହୋଇଛି ରାଜନୀତି । ତେବେ ରାଷ୍ଟ୍ରପତି ନିର୍ବାଚନ ନେଇ ସମସ୍ତ ଅଣ ବିଜେପି ରାଜନୈତିକ ଦଳ ମାନଙ୍କୁ ମମତାଙ୍କ ଚିଠି ଲେଖା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି । ଏହି ପ୍ରସଙ୍ଗରେ ମୁଁହ ଖୋଲିଛି ବିଜେଡି ।
ବିଜେଡି ସାଂସଦ ଅମର ପଟ୍ଟନାୟକ ଏନେଇ ନିଜର ପ୍ରତିକ୍ରିୟା ଦେଇଛନ୍ତି । ଅମର କହିଛନ୍ତି, "ମମତା ବାନାର୍ଜୀ ତ ଚିଠି ଲେଖିଛନ୍ତି ମାତ୍ର ଓଡ଼ିଶାର ସ୍ଵାର୍ଥକୁ ଦୃଷ୍ଟିରେ ରଖି ସବୁ ଦିଗକୁ ବିଚାର କରି ମୁଖ୍ୟମନ୍ତ୍ରୀ ଠିକ ସମୟରେ ନିଷ୍ପତ୍ତି ନେବେ । ସେ ମଧ୍ୟ ଏ ପ୍ରସଙ୍ଗରେ ପୂର୍ବରୁ ଦିଲ୍ଲୀରେ କହି ସାରିଛନ୍ତି । ଯେତେବେଳେ ଠିକ ସମୟ ଆସିବ ସେ ସମୟରେ ମୁଖ୍ୟମନ୍ତ୍ରୀ ନିଷ୍ପତ୍ତି ନେବେ । "
ସେପଟେ କଂଗ୍ରେସ କହିଛି ଯେ, ସମସ୍ତ ବିରୋଧୀ ଦଳ ଏକ ହୋଇ ରାଷ୍ଟ୍ରପତି ପ୍ରାର୍ଥୀ ଦେବା କଥା । କାହିଁକି ସଂଖ୍ୟା ତାଙ୍କର ବେଶୀ ରହିଛି । ମମତା ଯେଉଁ ପ୍ରୟାସ କରିଛନ୍ତି ନିଶ୍ଚିତ ଭାବେ ଧନ୍ୟବାଦ ଦେବା କଥା ବୋଲି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି ।
ସୂଚନା ଥାଉ କି ଆସନ୍ତା ୧୫ ତାରିଖରେ ଅଣ ବିଜେପି ଦଳ ମୁଖ୍ୟମାନଙ୍କୁ ଦିଲ୍ଲୀରେ ବୈଠକ ପାଇଁ ଆହ୍ବାନ କରିଛନ୍ତି ମମତା । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଡାକିଥିବା ଅଣ ବିଜେପି ନେତାଙ୍କ ତାଲିକାରେ ରହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ୨୨ ବରିଷ୍ଠ ନେତା । ଦିଲ୍ଲୀର କଂଷ୍ଟିଚ୍ୟୁସନ କ୍ଲବରେ ୧୫ ତାରିଖରେ ଏହି ବୈଠକ ହେବା ନେଇ ମଧ୍ୟ TMC ପକ୍ଷରୁ କୁହାଯାଇଛି ।
ଇଟିଭି ଭାରତ, ଭୁବନେଶ୍ବର
