ଭୁବନେଶ୍ବର: ରାଜଧାନୀରେ ପ୍ରଦୂଷଣ ରୋକିବା ପାଇଁ ମୋ ସାଇକେଲ ଯୋଜନା ଆରମ୍ଭ କରିଥିଲେ ରାଜ୍ୟ ସରକାର । ମାତ୍ର କବାଡିଖାନାରେ ଖତ ଖାଉଛି ଶହ ଶହ ସାଇକେଲ । ଜନତାଙ୍କ ଟିକସର ଏଭଳି ଅପବ୍ୟବହାର କରାଯାଇଛି ବୋଲି ଅଭିଯୋଗ କରି ବିଜେପି ଶିଶୁଭବନ ଛକ ନିକଟରେ ବିକ୍ଷୋଭ ପ୍ରଦର୍ଶନ କରିଛି ।
ଦୂରଦୃଷ୍ଟିହୀନ ଯୋଜନା କରି ଟଙ୍କା ଲୁଟି ନେଇ କିଛି ଦଲାଲ ମାଲାମାଲ ହୋଇଛନ୍ତି । ଜନତାଙ୍କ ଟିକସର ଏଭଳି ଅପବ୍ୟବହାରକୁ ବିଜେପି ନିନ୍ଦା କରିଛି । ୨୫ ହଜାର ଟଙ୍କାରେ କିଣା ଯାଇଥିବା ସାଇକେଲକୁ ଏବେ ମାତ୍ର ୫ଶହ ଟଙ୍କାରେ ବିକ୍ରି କରାଯାଉଛି । ଏହି ଯୋଜନାରେ ମହାଦୁର୍ନୀତି ହୋଇଛି ବୋଲି କହିଛି ବିଜେପି । ସରକାରଙ୍କ ଦୁର୍ନୀତିକୁ ବିଜେପି ତୀବ୍ର ବିରୋଧ କରି ଶିଶୁଭବନ ଛକ ନିକଟରେ ଭୁବନେଶ୍ବର ଜିଲ୍ଲା ବିଜେପି ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି ।
ତେବେ ସୂଚନା ଥାଉ କି ରାଜଧାନୀରେ ପ୍ରଦୂଷଣ ରୋକିବା ଲକ୍ଷ୍ୟ ନେଇ ୨୦୧୮ ମସିହାରେ ଆରମ୍ଭ ହୋଇଥିଲା ମୋ ସାଇକେଲ ଯୋଜନା । ଏ ନେଇ ବିଏମସି ସହ ଅନୁବନ୍ଧିତ ହୋଇଥିଲେ ୩ଟି ଘରୋଇ ସାଇକେଲ ଯୋଗାଣ ସଂସ୍ଥା ୟାନା, ୟୁଲୁ ଓ ହେକ୍ସି । ଏମାନଙ୍କୁ ସାଇକେଲ ଯୋଗାଣ, ମରାମତି ଦାୟିତ୍ବ ଦିଆଯାଇଥିଲା । ୩ଟି ଆପ୍ପ ମଧ୍ୟରୁ ଗୋଟିଏ ମଧ୍ୟ ଠିକ ଭାବେ କାମ କରୁନାହିଁ ବୋଲି ରାଜଧାନୀବାସୀ ପୂର୍ବରୁ ଅଭିଯୋଗ କରିଥିଲେ ।
କାରଣ କେତେବେଳେ ଏହି ଆପ୍ପ କାମ କରୁଛି ତ କେତେବେଳେ କରୁନି। ସବୁଠାରୁ ବଡ କଥା ହେଲା ପ୍ରାଥମିକ ପର୍ଯ୍ୟାୟରେ ୟୁଲୁ ଓ ୟାନା ପକ୍ଷରୁ ୫୦୦ ଲେଖାଏଁ ଓ ହେକ୍ସି ପକ୍ଷରୁ ଏକ ହଜାର ମୋ ସାଇକେଲ ରାଜଧାନୀ ନିବେଶ କରାଯାଇଥିଲା । ହେଲେ ୬ କୋଟି ବ୍ୟୟ ବରାଦରେ ହୋଇଥିବା ଏହି ମୋ ସାଇକେଲ ଯୋଜନା ଲୋକାଦ୍ରୁତ ନ ହେବା, ସାଇକେଲ ଗୁଡିକ ଏଠି ସେଠି ପଡ଼ିରହି ନଷ୍ଟ ହେବା ଯୋଗୁଁ ସାଇକେଲ ଯୋଗାଇଥିବା ସଂସ୍ଥା ମଧ୍ୟ ଚୁକ୍ତି ତୁଟାଇ ସାରିଥିବା ଜାଣିବାକୁ ମିଳିଛି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
