ଭୁବନେଶ୍ବର: ବିଜେଡି ନିଜ ସାଙ୍ଗଠନିକ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛି । ବିଜେଡିର ସାମ୍ବିଧାନିକ ପ୍ରାବଧାନ ଅନୁସାରେ ଏହି ନିର୍ବାଚନ ଅନୁଷ୍ଠିତ ହେବ । ତୃଣମୂଳ ସ୍ତର ଯଥା ଓ୍ଵାର୍ଡ ଓ ପଞ୍ଚାୟତ ସ୍ତରରୁ ଆରମ୍ଭ କରି ରାଜ୍ୟ ସଙ୍ଗଠନ ପର୍ଯ୍ୟନ୍ତ ଏହି ନିର୍ବାଚନ ହେବ । ଆସନ୍ତା ୩ ମାସ ମଧ୍ୟରେ ଏହି ନିର୍ବାଚନ ପ୍ରକ୍ରିୟା ଶେଷ ହେବ ବୋଲି ଦଳୀୟ ମୁଖପାତ୍ର ପ୍ରତାପ ଦେବ ସୂଚନା ଦେଇଛନ୍ତି ।
ନିର୍ବାଚନ ପାଇଁ ଡିଷ୍ଟ୍ରିକ୍ଟ ରିଟର୍ଣ୍ଣିଂ ଅଫିସର(ଡିଆରଓ) ଓ ଷ୍ଟେଟ ରିଟର୍ଣ୍ଣିଂ ଅଫିସର(ଏସଆରଓ) ନିଯୁକ୍ତି କରାଯିବ । ଏହା ସହ ସଙ୍ଗଠନକୁ ସୃଦୁଢ କରିବା ଓ ସଂଘଟିତ କରିବା ପାଇଁ ଏହି ପ୍ରକ୍ରିୟା କରାଯାଇଥିବା ପ୍ରତାପ ଦେବ ପ୍ରକାଶ କରିଛନ୍ତି । ସଭ୍ୟ ସଂଗ୍ରହ କରି ସରକାରଙ୍କ କାର୍ଯ୍ୟ ଲୋକଙ୍କ ପାଖରେ ପହଞ୍ଚାଇବା ଦଳର ମୂଳ ଲକ୍ଷ୍ୟ ବୋଲି ସଞ୍ଜୟ ଦାସବର୍ମା କହିଛନ୍ତି ।
ପୂର୍ବରୁ ବିଜେଡିର ୩ ଜଣ ନେତାଙ୍କୁ ଦଳର ସଭାପତି ନବୀନ ପଟ୍ଟନାୟକ ନୂଆ ଦାୟିତ୍ବ ପ୍ରଦାନ କରିଛନ୍ତି । ପ୍ରଣବ ପ୍ରକାଶ ଦାସଙ୍କୁ ସାଧାରଣ ସମ୍ପାଦକ (ସଂଗଠନ) ଦାୟିତ୍ବ ଦିଆଯାଇଥିବା ବେଳେ ସଞ୍ଜୟ ଦାସ ବର୍ମାଙ୍କୁ ସାଧାରଣ ସମ୍ପାଦକ(ମୁଖ୍ୟାଳୟ) ଦାୟିତ୍ବ ଓ ପ୍ରତାପ କେଶରୀ ଦେବଙ୍କୁ ବିଜେଡିର ରାଜ୍ୟ ରିଟର୍ଣ୍ଣିଂ ଅଫିସର ଭାବେ ଦାୟିତ୍ବ ମିଳିଛି।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
