ଭୁବନେଶ୍ବର: ରାଜ୍ୟରେ ରହିଛି ଅନେକ ଅସମ୍ପୂର୍ଣ୍ଣ ରେଳ ପ୍ରକଳ୍ପ । ଏନେଇ ରେଳମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ବିଜେଡି ରାଜ୍ୟସଭା ସାଂସଦ ଅମର ପଟ୍ଟନାୟକ । ଆଜି(ଶୁକ୍ରବାର) ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଚିଠି ଲେଖିଛନ୍ତି ଅମର ।
ଅମର ଚିଠିରେ ଉଲ୍ଲେଖ କରିଛନ୍ତି ଯେ, ରାଜ୍ୟରେ ଏବେ ବି ୬ ଜିଲ୍ଲାକୁ ଛୁଇଁନି ରେଳ ଲାଇନ । ଭୁବନେଶ୍ୱର ରେଳ ଷ୍ଟେସନକୁ ବିଶ୍ୱସ୍ତରୀୟ କରିବା ଲାଗି ଘୋଷଣା କରାଯାଇଛି । ହେଲେ ଗତ ୪ ବର୍ଷ ହେଲା ଭୁବନେଶ୍ବର ରେଳ ଷ୍ଟେସନ ବିକାଶ କାର୍ଯ୍ୟ ଆଗେଇ ପାରୁନି । ଏହି ପ୍ରକଳ୍ପ ପାଇଁ ରାଜ୍ୟ ସରକାରଙ୍କ ପକ୍ଷରୁ ଶତ ପ୍ରତିଶତ ଅର୍ଥ ଓ ଜମି ଯୋଗାଇ ଦିଆଯାଇଛି । ଏହାସହ ରାଜ୍ୟରେ ଥିବା ସବୁ ଅସମ୍ପୂର୍ଣ୍ଣ ପ୍ରକଳ୍ପର ସମୀକ୍ଷା କରି ପଦକ୍ଷେପ ନେବାକୁ ରେଳମନ୍ତ୍ରୀଙ୍କୁ ଅମର ଚିଠି ଲେଖି ଦାବି କରିଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
