ଭୁବନେଶ୍ବର: ଆଜି ବିଶ୍ୱ ନିର୍ମାତା ଦେବଶିଳ୍ପୀ ପ୍ରଭୁ ଶ୍ରୀ ବିଶ୍ୱକର୍ମାଙ୍କ ପୂଜା । କଟକଣା ମଧ୍ୟରେ ରାଜଧାନୀରେ ପ୍ରଭୁ ବିଶ୍ୱକର୍ମାଙ୍କ ପୂଜାର୍ଚ୍ଚନା କରାଯାଉଛି । ତେବେ ବିଶ୍ବକର୍ମା ହେଉଛନ୍ତି ସକଳ ଶିଳ୍ପକଳାକାରଙ୍କ ଜନକ । ବ୍ରହ୍ମାଙ୍କ ନିର୍ଦ୍ଦେଶରେ ବିଶ୍ୱକର୍ମା ସମଗ୍ର ସୃଷ୍ଟି ରଚନା କରିଥିଲେ । ତାଙ୍କ ଦ୍ୱାରା ଦେବତାମାନଙ୍କର ସମସ୍ତ ଶସ୍ତ୍ର, ବିମାନ ଆଦି ନିର୍ମିତ । ଏହି ଦିନରେ ସମସ୍ତ କାରିଗର, ଇଞ୍ଜିନିୟର୍, ଓ୍ୱେଲ୍ଡର, ମେକାନିକ୍ ଏବଂ ଅନ୍ୟମାନେ ଶିଳ୍ପୀ ଦେବତାଙ୍କୁ ପୂଜା କରିଥାନ୍ତି ।
ଗତଥର ପରି ଏଥର ମଧ୍ୟ କୋରୋନା ପାଇଁ ଫିକା ପଡ଼ିଛି ବିଶ୍ୱକର୍ମାଙ୍କ ପୂଜା । ହେଲେ ମନ୍ଦିର ଖୋଲାଥିବାରୁ କଟକଣା ସହ ଆସି ଭକ୍ତ ଦେବଶିଳ୍ପୀଙ୍କ ପୂଜା କରୁଛନ୍ତି । ଏନେଇ କଳିଙ୍ଗ ଷ୍ଟାଡିୟମ ନିକଟସ୍ଥ ବିଶ୍ୱକର୍ମାଙ୍କ ମନ୍ଦିରରେ ଭକ୍ତଙ୍କ ସମାଗମ ଦେଖିବାକୁ ମିଳିଛି । କୋରୋନା ପାଇଁ ଅଳ୍ପ ସଂଖ୍ୟକ ଭକ୍ତ ଏକତ୍ରିତ ହୋଇ ବିଶ୍ୱକର୍ମାଙ୍କ ଆରାଧନା କରିଛନ୍ତି । ସୁରୁଖୁରୁରେ ପୂଜା ଲାଗି ମନ୍ଦିର ପ୍ରଶାସନ ଧ୍ଯାନ ଦେଇ ଥିବାବେଳେ ଦେବଶିଳ୍ପୀଙ୍କ ପୂଜାର ସୁଯୋଗ ପାଇଥିବାରୁ ପରମାନନ୍ଦ ଲାଭ କରିଛି ବୋଲି ମନ୍ଦିର ପ୍ରଶାସନ ସଦସ୍ୟ ସନାତନ ମହାପାତ୍ର କହିଛନ୍ତି ।
ଦେବସ୍ମିତା ରାଉତ, ଇଟିଭି ଭାରତ
