ଭୁବନେଶ୍ବର: ଏଥର ମଧ୍ୟ ପିତୃପୁରୁଷଙ୍କୁ ପିଣ୍ଡଦାନରେ କଣ୍ଟାସାଜିଲା କୋଭିଡ ମହାମାରୀ । ସଂକ୍ରମଣକୁ ଦୃଷ୍ଟିରେ ରଖି ବିନ୍ଦୁସାଗରରେ ପିଣ୍ଡଦାନ ଉପରେ ରୋକ୍ ଲଗାଯାଇଥିବାରୁ ଘରେ ପିତୃପୁରୁଷଙ୍କୁ ପିଣ୍ଡ ଦେଉଛନ୍ତି ଲୋକେ । ମାତ୍ର କେତେକ ଲୋକେ ରାସ୍ତାଘାଟରେ ପିଣ୍ଡ ଦେଉଥିବା ଖବର ପାଇ ଘଉଡାଉଛି ପୋଲିସ ।
ଆଜି(ବୁଧବାର) ଆଶ୍ଵିନ କୃଷ୍ଣପକ୍ଷ ଅମାବାସ୍ୟା ତିଥି । ପିତୃପକ୍ଷର ଶେଷ ଦିନ । ପବିତ୍ର ମହାଳୟା ଶ୍ରାଦ୍ଧ ଅବସରରେ ପିତୃପୁରୁଷଙ୍କୁ ପିଣ୍ଡଦାନ କରିବାର ପରମ୍ପରା ରହିଛି । ଆଜିର ଦିନରେ ବିନ୍ଦୁସାଗରରେ ପିଣ୍ଡଦାନ ପାଇଁ ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ଜମିଥାଏ । କାରଣ ପୁରାଣରେ ବିଶ୍ୱାସ ରହିଛି ପିଣ୍ଡଦାନ ଶ୍ରାଦ୍ଧ ପକାଇଲେ ପିତୃପୁରୁଷ ଆଶୀର୍ବାଦ ଦିଅନ୍ତି । ତେବେ ସଂକ୍ରମଣ ଆଶଙ୍କା କରି ବିନ୍ଦୁସାଗରରେ ଶ୍ରାଦ୍ଧକୁ ବାରଣ କରାଯାଇଛି ।
ପୋଲିସ ମୁତୟନ କରାଯାଇ ଲୋକଙ୍କୁ ଗହଳି ନକରିବାକୁ ତାଗିଦ କରାଯାଉଛି । ତଥାପି ପରମ୍ପରା ରକ୍ଷା କରିବାକୁ ଯାଇ ରାସ୍ତାଘାଟରେ ଲୋକେ ପିଣ୍ଡଦାନ କରୁଥିବା ଦେଖିବାକୁ ମିଳିଛି । ଏପରିକି ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଲୋକଙ୍କୁ ଘଉଡାଇବାରୁ କିଏ ପିଣ୍ଡଦାନ କରିପାରିନି ତ ଆଉ କିଏ ତରବରିଆ ଭାବେ ଶ୍ରାଦ୍ଧ କରି ପିଣ୍ଡଦାନ କରୁଥିବା ଦେଖିବାକୁ ମିଳିଛି । ସେପଟେ ଏହାକୁ ନେଇ ବ୍ରାହ୍ମଣ ଓ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସୂଚନା ଅନୁଯାୟୀ ପୂର୍ବରୁ ମହାଳୟା ଶ୍ରାଦ୍ଧ ଅବସରରେ ବିନ୍ଦୁ ସାଗରରେ କଟକଣା ଲଗାଇଥିଲା ବିଏମସି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
