ଭୁବନେଶ୍ବର: ସ୍ମାର୍ଟସିଟି ଭୁବନେଶ୍ବର ହେବ ଜୁଡିସିଆରୀ ହବ୍ । ଓକିଲ ଓ ମହକିଲଙ୍କ ପାଇଁ ହେବ ସୁବିଧା । ଗୋଟିଏ ସ୍ଥାନରେ କରିହେବ ସମସ୍ତ ଆଇନଗତ ସମାଧାନ । ଏପରି କିଛି ଆଶା କରିଛନ୍ତି ଆଇନଜୀବୀ ଓ ସାଧାରଣ ଲୋକେ ।
ରାଜ୍ୟର ବିଭିନ୍ନ ସ୍ଥାନରୁ ଦୈନିକ 8ରୁ 10 ହଜାର କେସଧାରୀ ମହକିଲ ବିଭିନ୍ନ ମାମଲା ନେଇ ଭୁବନେଶ୍ବର ଆସୁଛନ୍ତି । ଏଠାରେ 5 ହଜାରରୁ ଅଧିକ ଓକିଲ କାମ ମଧ୍ୟ କରୁଛନ୍ତି । ରାଜଧାନୀର ବିଭିନ୍ନ ସ୍ଥାନରେ ଜୁଡିସିଆଲ, ଦେବୋତ୍ତର, ଚକବନ୍ଦୀ, ସିଭିଲ, କ୍ରିମିନାଲ ଓ ଟିକସ ଭଳି 100 ରୁ ଉର୍ଦ୍ଧ୍ବ କୋର୍ଟ ରହିଛି । ତେବେ ଏସମସ୍ତ କୋର୍ଟ ଗୋଟିଏ ସ୍ଥାନରେ ରହିଲେ ସୁବିଧା ହେବ ବୋଲି ଆଶା କରାଯାଉଛି । ଭୁବନେଶ୍ବର କୋର୍ଟ ପରିସରରେ ନୂଆ ବିଲଡିଂ ନିର୍ମାଣ ହେଉଥିବାରୁ ଏହି ସ୍ଥାନରେ ହିଁ ସମସ୍ତ କୋର୍ଟ ରହିବ ବୋଲି ଆଶା କରିଛି ବାର ଆସୋସିଏସନ ।
ଭୁବନେଶ୍ବର ରାଜ୍ୟର ରାଜଧାନୀ ହୋଇଥିବାରୁ ଅନେକ ଲୋକ ଏଠାକୁ ଆସନ୍ତି । ତେଣୁ ସେମାନଙ୍କ ସୁବିଧା ପାଇଁ ଗୋଟିଏ ସ୍ଥାନରେ ହିଁ ସମସ୍ତ କୋର୍ଟ କଲେ ଭଲ ହେବ ବୋଲି ଭୁବନେଶ୍ବର ବାର ଆସୋସିଏସନର କର୍ମକର୍ତ୍ତା କହିଛନ୍ତି । ସେପଟେ ଭୁବନେଶ୍ବରରେ ଅନେକ କୋର୍ଟ ଥିଲେ ମଧ୍ୟ ଅଲଗା ଅଲଗା ସ୍ଥାନରେ ରହୁଥିବାରୁ ଲୋକଙ୍କୁ ନାନା ସମସ୍ୟାର ସମ୍ମୁଖୀନ ହେବାକୁ ପଡୁଛି । ତେଣୁ ଗୋଟିଏ ସ୍ଥାନରେ ହିଁ କୋର୍ଟ ହେଲେ ସୁବିଧା ମିଳିବ ବୋଲି ସାଧାରଣ ଲୋକେ ଆଶା ରଖିଛନ୍ତି ।
ତେବେ ସମସ୍ତ ଅସୁବିଧାକୁ ଲକ୍ଷ୍ୟ କରି ଗୋଟିଏ ସ୍ଥାନରେ ସବୁ କୋର୍ଟ କାର୍ଯ୍ୟ କରିବା ନେଇ ଦାବି ଜୋର ଧରିଥିବାବେଳେ ଏହା କେତେଦୂର କାର୍ଯ୍ୟକାରୀ ହେଉଛି ତାହା ସମୟ କହିବ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
