ଭୁବନେଶ୍ବର: ଗଞ୍ଜାମର ଗୋଳନ୍ଥରାର ଘଟିଥିବା ବସ ଦୁର୍ଘଟଣାରେ ଲିଭିଯାଇଛି 10 ଜଣଙ୍କ ଜୀବନ ଦୀପ । ଏହାସହ ଅନେକ ଯାତ୍ରୀ ଆହତ ମଧ୍ୟ ହୋଇଛନ୍ତି । ତେବେ ଏହି ବସ ଟ୍ରାଜେଡି ଘଟଣାରେ ସରକରାଙ୍କୁ ଘେରିଛି ରାଜ୍ୟ କଂଗ୍ରେସ । ମୃତକଙ୍କ ପରିବାରକୁ 30 ଲକ୍ଷ କ୍ଷତିପୂରଣ ଦାବି ସହ ବିଦ୍ୟୁତ ସେବା ପ୍ରଦାନକାରୀ କମ୍ପାନୀ ‘ସାଉଥକୋ’ ଅଧିକାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କଂଗ୍ରେସ ଦାବି ବାଢିଛି ।
ତେବେ ଏନେଇ ସୋମବାର ସନ୍ଧ୍ୟାରେ ଆୟୋଜିତ ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା ସତ୍ୟପ୍ରକାଶ ନାୟକ କହିଛନ୍ତି, ‘ଏଭଳି ସମ୍ବେଦନଶୀଳ ଘଟଣାରେ ରାଜ୍ୟ ସରକାର ଏହାର ଉତ୍ତର ଦାୟିତ୍ବ ଗ୍ରହଣ କରିବା କଥା । ମାତ୍ର ସରକାରଙ୍କ ପରିବହନ ଓ ଶକ୍ତି ବିଭାଗ ପରସ୍ପର ଉପରେ ଦୋଷ ଲଦାଲଦି ହେଉଛନ୍ତି । ଘଟଣାର 20 ଘଣ୍ଟାରୁ ଉର୍ଦ୍ଧ୍ବ ବିତିଯାଇଥିଲେ ବି ଶକ୍ତି ମନ୍ତ୍ରୀ ଲୁଚି ବସିଛନ୍ତି । ଏଥି ସହିତ ସେ ରାଜ୍ୟବାସୀଙ୍କ ନିକଟରେ ସଠିକ ତଥ୍ୟ ଉପସ୍ଥାପନ ନ କରି ତଳିଆ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ନିଜ ଦୋଷକୁ ଚାପି ଦେବାକୁ ଉଦ୍ୟମ କରୁଛନ୍ତି ।’
ଏଥିସହିତ ବିଦ୍ୟୁତ ସେବା ପ୍ରଦାନକାରୀ କମ୍ପାନୀ "ସାଉଥକୋ" ଉପରିସ୍ଥ ଅଧିକାରୀଙ୍କୁ ନିଲମ୍ବଲ ଓ ରାଜକୋଷରୁ ନୂହେଁ କମ୍ପାନୀଠାରୁ ହିଁ କ୍ଷତିପୂରଣ ଭରଣାର ଦାବି କରିଛି କଂଗ୍ରେସ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
