ଭୁବନେଶ୍ବର: ନିଜ ଭୁଲ ମାନିଛନ୍ତି ସାଂସଦ ଅପରାଜିତା ଷଡଙ୍ଗୀ । କୋରୋନା ଗାଇଡଲାଇନ ମାନିନଥିବାରୁ ଦେଇଛନ୍ତି ଫାଇନ । ଏନେଇ ସେ ନିଜ ଟ୍ବିଟରରେ ସୂଚନା ଦେଇଛନ୍ତି ।
ପ୍ରକାଶ ଥାଉ କି ଗତକାଲି ବିଜେପି ନେତା ଜଗନ୍ନାଥ ପ୍ରଧାନଙ୍କ ଘରକୁ ଯାଇଥିଲେ ଅପରାଜିତା ଷଡଙ୍ଗୀ । ଭୁବନେଶ୍ବର ବିଜେପି ସଭାପତି ଚୟନରେ ଅସନ୍ତୁଷ୍ଟ ହୋଇ ଜଗନ୍ନାଥ ପ୍ରଧାନ ଦଳରୁ ଇସ୍ତଫା ଦେଇଥିଲେ । ଏହି ଅବସରରେ ତାଙ୍କ ଘରେ ଅପରାଜିତାଙ୍କ ସମେତ ଅନ୍ୟ ତୁଙ୍ଗ ନେତୃବୃନ୍ଦ ମଧ୍ୟ ଉପସ୍ଥିତ ରହିଥିଲେ । ହେଲେ ଏହି ସମୟରେ ସେ ମାସ୍କ ପିନ୍ଧିନଥିଲେ । ଏପରିକି ସାମାଜିକ ଦୂରତା ବଜାୟ ରଖିନଥିଲେ । ଯାହା ଭୁବନେଶ୍ବର ସାଂସଦଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଥିଲା ।
ସୋସିଆଲ ମିଡିଆରେ ଏହାକୁ ନେଇ ସମାଲୋଚନର ଶିକାର ହୋଇଥିଲେ ସାଂସଦ । ସାଧାରଣ ଲୋକ କୋରୋନା ନିୟମ ମାନୁଥିବାବେଳେ ଜଣେ ସାଂସଦ ଏହା ନମାନିବାକୁ ସମାଲୋଚନା କରାଯାଇଥିଲା । ଶେଷରେ ଏ ସମ୍ପର୍କରେ ମୁହଁ ଖୋଲିଛନ୍ତି ଅପରାଜିତା । ଟ୍ବିଟ୍ କରି କହିଛନ୍ତି ଯେ ଲୋକଙ୍କ ଉଦବେଗକୁ ସମ୍ମାନ ଦେଉଛି । ଏହା ଏକ ଭଲ ସଙ୍କେତ । ଏକ ଘଟଣାଚକ୍ରରେ ପଡି ଜଗନ୍ନାଥ ପ୍ରଧାନଙ୍କ ଘରକୁ ଯାଇଥିଲି । ମୋ କର୍ତ୍ତବ୍ୟ ସମ୍ପାଦନ କରିବାକୁ ଯାଇ ଆବଶ୍ୟକ ଜୋରିମାନା ଦେଇଛି ବୋଲି ସେ କହିଛନ୍ତି ।
ସାଂସଦ ଅପରାଜିତାଙ୍କ ସୋସିଆଲ ମିଡିଆରେ ଫଟୋ ଭାଇରାଲ ପରେ ଏପିଡେମିକ ଆକ୍ଟ ଭାଓଲେସନ ନେଇ କ୍ୟାପିଟାଲ ଥାନାରେ ହୋଇଛି ଅଭିଯୋଗ । ସାଂସଦଙ୍କୁ ତୁରନ୍ତ ଗିରଫ ପାଇଁ ଦାବି କରିଛନ୍ତି ଅଭିଯୋଗକାରୀ ସମୀମ ଖାନ ଓ ଯୋଗେଶ ଚନ୍ଦ୍ର ଜେନା ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ,ତପନ ଦାସ ଓ ତାପସ ପରିଡା , ଇଟିଭି ଭାରତ
