ଭୁବନେଶ୍ବର: ସାରା ବିଶ୍ବକୁ ଗ୍ରାସ କରିଛି କୋରୋନା ମହାମାରୀ । ପ୍ରଭାବରେ ଫିକା ପଡିଲାଣି ପୂଜା ପର୍ବାଣୀ । ଆଉ ଆଗକୁ ଆସୁଥିବା ରାକ୍ଷୀ ପୂର୍ଣ୍ଣିମା ବି ଫିକା ପଡିବ ବୋଲି ପ୍ରାୟ ସ୍ପଷ୍ଟ ହୋଇଗଲାଣି । ଏମିତିରେ ଗତ ବର୍ଷମାନଙ୍କ ତୁଳନାରେ ଏବର୍ଷ ରାକ୍ଷୀ ବଜାର ମଧ୍ୟ ଖାଁ ଖାଁ ଦେଖାଯାଉଛି । ହେଲେ ବଜାରକୁ ନିଜ ଉଦ୍ୟମରେ ସକ୍ରିୟ ରଖି ନିଜ ପ୍ରତିଭାର ନିଦର୍ଶନ ଦେଉଛନ୍ତି ରାଜଧାନୀର ଅଟିଷ୍ଟିକ ପିଲାମାନେ । ଘରେ କେବଳ ବସି ନରହି ଏମାନେ ପ୍ରସ୍ତୁତ କରୁଛନ୍ତି ମନଲୋଭା ରଙ୍ଗ ବେରଙ୍ଗର ରାକ୍ଷୀ । ଯାହାକୁ ବଜାରରେ ସୁଲଭ ମୂଲ୍ୟରେ ପହଞ୍ଚାଉଛି ୱିଫୋରୟୁ ଏନଜିଓ ସଂସ୍ଥା ।
ଲକଡାଉନ ସମୟରେ ପିଲାମାନେ ଘରେ ବସି ରହୁଥିବାରୁ ସେମାନଙ୍କ ଉପରେ ପଡୁଛି ଅନେକ ମାନସିକ ଚିନ୍ତା । ଫଳରେ ଅଳ୍ପ ସମୟରେ ଅସ୍ଥିର ହୋଇ ପଡୁଛନ୍ତି ଛାତ୍ରଛାତ୍ରୀ । ଏମିତିରେ ଘରେ କେବଳ ବସି ନରହି ନିଜକୁ ବ୍ୟସ୍ତ ରଖି କିଛି କଳାତ୍ମକ କାର୍ଯ୍ୟରେ ନିଜକୁ ନିୟୋଜିତ କରିଛନ୍ତି ରାଜଧାନୀର ଅଟିଷ୍ଟିକ ଛାତ୍ରମାନେ । ସାଧାରଣତଃ ଅଟିଷ୍ଟିକ ପିଲାମାନଙ୍କୁ ନେଇ ସମାଜର ରହିଛି ଏକ ଭିନ୍ନ ଚିନ୍ତାଧାରା । ଏମାନେ ଭିନ୍ନ ଓ ଏମାନଙ୍କୁ ଆବଶ୍ୟକ କିଛି ସ୍ବତନ୍ତ୍ର ଦୃଷ୍ଟିକୋଣ । ହେଲେ ଏହି ଚିରାଚରିତ ଚିନ୍ତାଧାରାକୁ ଭାଙ୍ଗି ଦୁଇ ପାଦ ଆଗେଇ ଆସିଛନ୍ତି ଅଟିଷ୍ଟିକ ଛାତ୍ରମାନେ ।
ଶିକ୍ଷାଦାନରେ ଏମାନଙ୍କ କଳାତ୍ମକ ବିକାଶକୁ ମଧ୍ୟ ସ୍ବତନ୍ତ୍ର ଧ୍ୟାନ ଦିଆଯାଉଥିବାରୁ ବର୍ଷ ତମାମ ବିଭିନ୍ନ ପୂଜା ପର୍ବାଣୀ ସମୟରେ ନିଜ କଳାର ପରିଚୟ ଦେଇଥାଆନ୍ତି ଏମାନେ । ଫଳରେ ରାକ୍ଷୀ ପୂର୍ଣ୍ଣିମାରେ ରାକ୍ଷୀ ପ୍ରସ୍ତୁତିଠାରୁ ଆରମ୍ଭ କରି ଦାପୀବଳୀରେ ଦୀପ ପ୍ରସ୍ତୁତ କରନ୍ତି ଏମାନେ । ଯାହାକୁ ବଜାରରେ ବିକି ଏହି ଅଟିଷ୍ଟିକ ଛାତ୍ରଛାତ୍ରୀଙ୍କୁ ଆତ୍ମନିର୍ଭରଶୀଳ କରାଇ ପାରନ୍ତି ଏନଜିଓ ସଂସ୍ଥା ।
ତେବେ ଚଳିତବର୍ଷ ତମାମ ବାଧାବିଘ୍ନ ସତ୍ତ୍ବେ ସାଧାରଣ ଘରୋଇ ସାମଗ୍ରୀ ଯଥା ଚାଉଳ, ସୋରିଷ, ଧାନ, ଲବଙ୍ଗ ଓ ଚୁମକି, ଷ୍ଟୋନ ବ୍ୟବହାର କରି ଦିନକୁ ପ୍ରାୟ 200 ରାକ୍ଷୀ ପ୍ରସ୍ତୁତ କରୁଛନ୍ତି ଏହି ଅଟିଷ୍ଟିକ ଛାତ୍ର । ଯାହାକୁ ଅନଲାଇନ ମାଧ୍ୟମରେ ବିକ୍ରି କରି ରାଜ୍ୟ ତଥା ରାଜ୍ୟ ବାହର ଲୋକଙ୍କ ପାଖରେ ପହଞ୍ଚାଉଛି ୱିଫୋରୟୁ ଏନଜିଓ ସଂସ୍ଥା । ସେପଟେ ଏପରି ଭାବେ କାର୍ଯ୍ୟରେ ନିଜକୁ ନିଯୋଗ କରି ପିଲାମାନେ ମଧ୍ୟ ଖୁସି ରହୁଥିବା ସେମାନଙ୍କ ଅଭିଭାବକ ପ୍ରକାଶ କରିଛନ୍ତି । ଯଦି ଏହିପରି ଭାବେ ପ୍ରୋତ୍ସାହନ ମିଳୁଥିବ ତେବେ ଏମାନେ ସମାଜର ମୁଖ୍ୟସ୍ରୋତରେ ଆତ୍ମବିଶ୍ବାସର ସହ ସାମିଲ ହୋଇପାରିବେ ନିଶ୍ଚୟ ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
