ସମ୍ବଲପୁର/ଭୁବନେଶ୍ବର: ରାଜ୍ୟ ସରକାରଙ୍କ 5T କିଛି ଅଭିନବ ପଦକ୍ଷେପ ନୁହେଁ । ଏହା ହେଉଛି ପାରମ୍ପରିକ ପରିଚାଳନାର ଏକ ଶୃଙ୍ଖଳା । କିନ୍ତୁ ରାଜ୍ୟ ସରକାର ବିଗତ 20 ବର୍ଷରେ ଏନେଇ କୌଣସି ଚର୍ଚ୍ଚା ନକରି ଏବେ ଏହାକୁ ଭିନ୍ନ ରୂପରେ ଗୁରୁତ୍ବ ଦେଉଛନ୍ତି । ଏହାର କାର୍ଯ୍ୟକାରିତାରେ ତ୍ରୁଟି ରହିଛି ଏହା ଏକ ହାସ୍ୟାସ୍ପଦ କଥା ବୋଲି କହିଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ । ଆଉ ଅପରାଜିତାଙ୍କ ଏହି ଅଭିଯୋଗରେ ଶାସକ ବିଜେଡି ତରଫରୁ ଜବାବ ଦେଇଛନ୍ତି ଦଳୀୟ ମୁଖପାତ୍ର ସସ୍ମିତ ପାତ୍ର ।
ଶାସନ ବ୍ୟବସ୍ଥାରେ ବରିଷ୍ଠ ପ୍ରଶାସକଙ୍କୁ ଅଣଦେଖା କରି କନିଷ୍ଠ ଅଫିସର ନିଷ୍ପତି ନେବା ଦୁର୍ଭାଗ୍ୟଜନକ । 5ଟି ବ୍ୟବସ୍ଥାରେ ମନ୍ତ୍ରୀ ସଚିବଙ୍କୁ ଗୁରୁତ୍ବ ଦିଆଯାଉନଥିବା ଅଭିଯୋଗ କରିଛନ୍ତି ଅପରାଜିତା । ତେବେ ଅପରାଜିତାଙ୍କ ଏହି ଅଭିଯୋଗର ଜବାବ ରଖିଛି ଶାସକ ବିଜେଡି । ଦଳୀୟ ମୁଖପାତ୍ର ସସ୍ମିତ ପାତ୍ର କହିଛନ୍ତି ମାଡାମ ଷଡଙ୍ଗୀଙ୍କର ଏକ ପରିଚୟ ଥିଲା । ଏବେ ସେ ରାଜନୀତି ପାଇଁ ଭଲ କାମକୁ ମଧ୍ୟ ସମୋଲୋଚନା କରୁଛନ୍ତି । ନିଜ ଜ୍ଞାନକୁ ଦେଖାଇବାକୁ ଯାଇ ସେ ଏମିତି ବକ୍ତବ୍ୟ ରଖୁଛନ୍ତି , ସେ 5ଟି ଓ ମୋ ସରକାରକୁ ନେଇ ବିଚଳିତ ଓ ବିବ୍ରତ ହୋଇପଡିଛନ୍ତି । ଏହି ଯୋଜନାକୁ ଭବିଷ୍ୟତରେ ବିଜେପି ଶାସିତ ରାଜ୍ୟ ଓ କେନ୍ଦ୍ର ସରକାର ମଧ୍ୟ ପ୍ରଚଳନ କରିବେ ବୋଲି କହିଛନ୍ତି ।
ସମ୍ବଲପୁରରୁ ବାଦଶାହା ଜୁଷ୍ମନ ରଣା ଓ ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
