ଭୁବନେଶ୍ବର : ରାଜ୍ୟର ସର୍ବପୁରାତନ ଉତ୍କଳ ବିଶ୍ବବିଦ୍ୟାଳୟରେ ଶିଖ ଧର୍ମଗୁରୁ ଗୁରୁ ନାନକଙ୍କ ଚେୟାର ପ୍ରତିଷ୍ଠା କରିବା ପାଇଁ ଦାବି । ଏଭଳି ଦାବି କରିଛନ୍ତି ସାମାଜିକ କର୍ମୀ ଅନୀଲ ଧୀର । ଏନେଇ ସେ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂହଙ୍କୁ ଚିଠି ଲେଖି ଅନୁରୋଧ କରିଛନ୍ତି ।
ଗୁରୁ ନାନକଙ୍କର 550 ତମ ଜନ୍ମଜୟନ୍ତୀ ଉପଲକ୍ଷେ ଓଡିଶାର ସର୍ବପୁରାତନ ଉତ୍କଳ ବିଶ୍ବବିଦ୍ୟାଳୟରେ ନାନକଙ୍କ ଚେୟାର ପ୍ରତିଷ୍ଠା କରା ଗଲେ ଶିକ୍ଷିଜିମ ଉପରେ ଓଡିଶାର ଛାତ୍ରଛାତ୍ରୀମାନେ ଅଧ୍ୟ୍ୟୟନ ଏବଂ ଗବେଷଣା ପାଇଁ ସୁଯୋଗ ପାଇବେ । ଏହାଦ୍ବାରା ପଞ୍ଜାବ ଏବଂ ଓଡିଶା ମଧ୍ୟରେ ସାଂସ୍କୃତିକ ଭାବ ବିନିମୟ ହେବ । ସେହିଭଳି ଭାବରେ ପଞ୍ଜାବର କୌଣସି ବିଶ୍ବବିଦ୍ୟାଳୟରେ ମଧ୍ୟ ଜଗନ୍ନାଥଙ୍କ ସଂସ୍କୃତି ପ୍ରଚାର ପ୍ରସାର ଏବଂ ଗବେଷଣା କରିବା ପାଇଁ ସେ ଅପିଲ କରିଛନ୍ତି ।
ଓଡିଶା ସହିତ ଗୁରୁ ନାନକଙ୍କ ସମ୍ପର୍କ ବହୁ ପୁରୁଣା । 1506 ମସିହାରେ ଗୁରୁ ନାନକ ଓଡିଶା ଆସି ପୁରୀରେ ଜଗନ୍ନାଥଙ୍କୁ ଦର୍ଶନ ମଧ୍ୟ କରିଥିଲେ । ଓଡିଶା ବାହାରେ ଜଗନ୍ନାଥ ସଂସ୍କୃତି ପ୍ରଚାର ପ୍ରସାର କରିବାରେ ଗୁରୁ ନାନକ ଏବଂ ଚୈତନ୍ୟଙ୍କ ବିଶେଷ ଭୂମିକା ଥିଲା । ଓଡିଶାର ବିଭିନ୍ନ ପ୍ରାନ୍ତରେ ନାନକ ଅବସ୍ଥାନ କରିଥିଲେ । ପ୍ରମାଣ ସ୍ବରୂପ ପୁରୀରେ ବାଉଳି ମଠ, ମଙ୍ଗୁ ମଠ ଏବଂ ପଞ୍ଜାବୀ ମଠ ନାନକପନ୍ଥୀ ମାନେ ପ୍ରତିଷ୍ଠା କରିଛନ୍ତି । ଭଦ୍ରକର ମାର୍କୋନା, ବିରଞ୍ଚିପୁର ଏବଂ ଓଡିଶାର ବିଭିନ୍ନ ସ୍ଥାନରେ ନାନକ ଡିହା ଏବେବି ରହିଛି । ତେଣୁ ଗୁରୁ ନାନକଙ୍କ ଜନ୍ମ ଜୟନ୍ତୀ ଉପଲକ୍ଷେ ଏହି ଚେୟାର ପ୍ରତିଷ୍ଠା ହେବା ନେଇ ଆଶା ରଖିଛନ୍ତି ଅନୀଲ ଧୀର ।
ତେବେ ଗତ 3 ଦିନ ତଳେ ପଞ୍ଜାବ ମୁଖ୍ୟମନ୍ତ୍ରୀ 11 ଗୋଟି ଚେୟାର ପ୍ରତିଷ୍ଠା ନେଇ ଘୋଷଣା କରିଛନ୍ତି । ଏପରିକି ଇରାନରେ ଥିବା ଏକ ବିଶ୍ବବିଦ୍ୟାଳୟରେ ମଧ୍ୟ ଏକ ଚେୟାର ପ୍ରତିଷ୍ଠା କରିବା ନେଇ ଘୋଷଣା କରାଯାଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
