ଭୁବନେଶ୍ବର: ରାଜ୍ୟ କ୍ୟାବିନେଟରେ ହୋଇଥିବା ଗୁରୁତ୍ବପୂର୍ଣ୍ଣ ବୈଠକରେ ବଡ ନିଷ୍ପତ୍ତି । ଓଡ଼ିଶା ୟୁନିଭର୍ସିଟି ଆକ୍ଟ ୧୯୮୯ରେ ପରିବର୍ତ୍ତନ ହୋଇଛି । ସମସ୍ତ ୟୁନିଭର୍ସିଟି ପରିଚାଳନା ଗୋଟିଏ ଆକ୍ଟ ଅଧିନରେ ରହିବ । ଏ ସଂକ୍ରାନ୍ତରେ ଏକ ଅଧ୍ୟାଦେଶକୁ ମୋହର ମାରିଛି ରାଜ୍ୟ କ୍ୟାବିନେଟ । ଏହାସହ ରେଭେନ୍ସା ବିଶ୍ବବିଦ୍ୟାଳୟ ଆକ୍ଟ ୨୦୦୫କୁ ରଦ୍ଦ କରି ଦିଆଯାଇଛି ।
ସେହିପରି ବିଶ୍ବବିଦ୍ୟାଳୟରେ ସିନେଟ ବ୍ୟବସ୍ଥା ହଟାଇ ଦିଆଯାଇଛି । ସିନେଟ ବଦଳରେ ଏଣିକି ସିଣ୍ଡିକେଟ ବିଶ୍ବବିଦ୍ୟାଳୟ ଦାୟିତ୍ବରେ ରହିବ । ସିଣ୍ଡିକେଟରେ ଉଭୟ ଚାନସେଲର ଓ ସରକାରଙ୍କ ପ୍ରତିନିଧି ରହିବେ । ଅନ୍ୟପକ୍ଷେ ବିଶ୍ବବିଦ୍ୟାଳୟ କୁଳପତିଙ୍କ କାର୍ଯ୍ୟକାଳ ୩ ବର୍ଷରୁ ୪ ବର୍ଷକୁ ବୃଦ୍ଧି ହୋଇଛି । ଭିସିଙ୍କ ଅବସର ବୟସ ୬୫ ବର୍ଷ ବଦଳରେ ୬୭ ବର୍ଷ କରାଯାଇଛି ।
ଭିସି ଚୟନ ପାଇଁ କମିଟିରେ ସରକାରଙ୍କ ପ୍ରତିନିଧି ଭାବେ ଜଣେ ରହିବେ । ଗୋଟିଏ ବିଶ୍ବବିଦ୍ୟାଳୟରେ କ୍ରମାଗତ ୨ ଥର କୁଳପତି ଭାବରେ ଦାୟିତ୍ବ ନିର୍ବାହ କରିପାରିବେନାହିଁ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
