ଭୁବନେଶ୍ବର: କଂଗ୍ରେସ କାର୍ଯ୍ୟକାରୀ ସଭାପତି ପ୍ରଦୀପ ମାଝୀଙ୍କ ବିବାଦୀୟ ବୟାନକୁ ନେଇ କଂଗ୍ରେସକୁ ଟାର୍ଗେଟ କଲା ବିଜେପି । ହିଂସା ପଛରେ ସୋନିଆ ଗାନ୍ଧୀଙ୍କ ହାତ ଥିବା ଅଭିଯୋଗ ଆଣିଛି ବିଜେପି । ରବିବାର ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ କାହିଁକି ତାଙ୍କ ଉପରେ କାର୍ଯ୍ୟାନୁଷ୍ଠାନ ନେଉନାହିଁ ବୋଲି ପ୍ରଶ୍ନ କରିଛନ୍ତି ବିଜେପି ମୁଖପାତ୍ର ଗୋଲକ ମହାପାତ୍ର।
କଂଗ୍ରେସ ଅହିଂସାରେ ବିଶ୍ବାସ କରେ କିନ୍ତୁ ଏ ପର୍ଯ୍ୟନ୍ତ ଦଳୀୟ ହାଇକମାଣ୍ଡ କାର୍ଯ୍ୟାନୁଷ୍ଠାନ ନେଉ ନଥିବାରୁ ଏହା ବୁଝାପଡୁଛି କି ଏଭଳି ହିଂସା ପଛରେ ସୋନିଆ ଗାନ୍ଧୀଙ୍କ ନିର୍ଦେଶ ରହିଛି ଯାହାକୁ ଓଡ଼ିଶାରେ କାର୍ଯ୍ୟକାରୀ କରୁଛନ୍ତି ପୂର୍ବତନ ସାଂସଦ ପ୍ରଦୀପ ମାଝୀ ବୋଲି କହିଛନ୍ତି ଗୋଲକ ମହାପାତ୍ର । ସେପଟେ ନିରଞ୍ଜନଙ୍କ ବୟାନରୁ ବୁଝାପଢୁଛି ଏହା ଏକ ପ୍ରାୟୋଜିତ ଘଟଣା । ଜାତୀୟ ସମ୍ପତିକୁ ନଷ୍ଟ କରିବା ଏକ ନିନ୍ଦନୀୟ ଘଟଣା । ଏହାକୁ ବିଜେପି ଦୃଢ ନିନ୍ଦା କରୁଛି ବୋଲି ବିଜେପି ମୁଖପାତ୍ର କହିଛନ୍ତି ।
ଏଠାରେ ସୂଚନାଥାଉ ଯେ ଦୁଇ ଦିନ ତଳେ ନବରଙ୍ଗପୁରରେ ନାବାଳିକା ଦୁଷ୍କର୍ମ ଓ ହତ୍ୟା ଘଟଣାରେ କଂଗ୍ରେସ କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ଫୋନ ଯୋଗେ କର୍ମୀମାନଙ୍କୁ ବିବାଦୀୟ ମନ୍ତବ୍ୟ ଦେଇଥିଲେ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
