ଭୁବନେଶ୍ବର: ଏଣିକି କୃଷି ଋଣ ପାଇଁ ଆଧାର କାର୍ଡ ବାଧ୍ୟତାମୂଳକ । ଯୋଗ୍ୟ ଚାଷୀ କୃଷି ଋଣ ନେଉଛନ୍ତି ନା ନାହିଁ ଓ ସରକାରୀ ସୁବିଧାରୁ ଉପକୃତ ହେଉଛନ୍ତି ନା ନାହିଁ ତାହା ଜାଣିବା ପାଇଁ ଏପରି ନିଷ୍ପତ୍ତି ନେଇଛି ସମବାୟ ବିଭାଗ । ତେବେ ସେପ୍ଟେମ୍ବର ୩୦ ସୁଦ୍ଧା ଆଧାର ସଂଯୋଗୀକରଣ ଶେଷ କରିବା ପାଇଁ ସମୟ ସୀମା ଧାର୍ଯ୍ୟ କରାଯାଇଛି ।
କିଷାନ କ୍ରେଡିଟ କାର୍ଡ ହେଉ ଅବା ସଞ୍ଚୟ ଖାତା ସବୁଥିରେ ଆଧାର କାର୍ଡ ଲିଙ୍କ କରିବା ହେବ ବାଧ୍ୟତାମୂଳକ । ଏପରିକି ଯେଉଁମାନେ ଖରିଫ ଋଣ ନେଇଛନ୍ତି ସେମାନଙ୍କ ପାଇଁ ମଧ୍ୟ ଆଧାରକାର୍ଡ ଲିଙ୍କ୍ କରିବା ବାଧ୍ୟତାମୂଳକ । ବିନା ଆଧାରକାର୍ଡ ସଂଯୋଗରେ ଚାଷୀକୁ ମିଳିବନି ଋଣ। ଏଥିପାଇଁ ସମବାୟ ରେଜିଷ୍ଟ୍ରାର ଚିଠି ଲେଖିଛନ୍ତି ।
ତେବେ ରାଜ୍ୟରେ 48 ଲକ୍ଷ 99 ହଜାର 343 ଚାଷୀଙ୍କୁ କ୍ରେଡିଟ କାର୍ଡ ଦିଆଯାଇଥିବା ବେଳେ ମାତ୍ର 10 ଲକ୍ଷ 80 ହଜାର 219 ଚାଷୀଙ୍କ ଆଧାର ସଂଯୋଗ ହୋଇଛି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
