ଭୁବନେଶ୍ବର: ସ୍ପେଶାଲ ସ୍କ୍ବାର୍ଡ କବଜାରେ ହାଇଟେକ ଲୁଟେରା । ନିଜକୁ ଆୟକର ବିଭାଗର ଅଧିକାରୀ କହି ଲୋକଙ୍କ ଠାରୁ ଲୁଟୁଥିବା ଏହି ଲୁଟେରାକୁ ଗିରଫ କରିବାରେ ସଫଳ ହୋଇଛି ପୋଲିସର ସ୍ପେଶାଲ ସ୍କ୍ବାର୍ଡ। ବାଙ୍ଗାଲୋର ବି.କେ ଲେଲେଙ୍ଗାକୁ ଗିରଫ କରିଛି କମିସନରେଟ ପୋଲିସର ସ୍ପେଶାଲ ସ୍କ୍ବାର୍ଡ।
ଅଭିଯୁକ୍ତ ଜଣକ ଫାଇଭ ଷ୍ଟାର ହୋଟେଲରେ ରହିବା ସହ ଫ୍ଲାଇଟରେ ଗୋଟିଏ ଜାଗାରୁ ଆଉ ଏକ ଜାଗାକୁ ବୁଲୁଥିଲା । ଇନକମ ଟ୍ୟାକ୍ସ ଅଫିସର କହି ସୁନା ଦୋକାନରେ ପଶୁଥିଲା। ନିଜର ପେମେଣ୍ଟ କରିଦେବା ବାହାନାରେ ଅନଲାଇନରେ ମେସେଜ ପଠାଇ କଳାକନା ବୁଲାଉଥିଲା। ଏମିତି ଏକ ଏମବିଏ ଛାତ୍ରକୁ ଗିରଫ କରିଛି କମିସନରେଟ ପୋଲିସର ସ୍ପେଶାଲ ସ୍କ୍ବାର୍ଡ।
ଏହି ଲୁଟେରାର ଟାର୍ଗେଟର ଥିଲେ ଅନେକ ସୁନା ଦୋକାନୀ। ସମ୍ବଲପୁର, ଝାରସୁଗୁଡା, ପୁରୀର ଅନେକ ସୁନା ଦୋକାନୀକୁ ଚୁନା ଲଗାଇଛି ଏହି ହାଇଟେକ ଲୁଟେରା। ଅଭିଯୁକ୍ତର ଘର ବାଙ୍ଗାଲୋର ହୋଇଥିବାବେଳେ ବିଭିନ୍ନ ସମୟରେ ଓଡିଶା ଆସି ଏପରି ଘଟଣା ଘଟାଇଥିବା ଜଣାପଡିଛି ।
ତେବେ ଗିରଫ ପରେ ତାକୁ ସମ୍ବଲପୁର ପୋଲିସକୁ ହସ୍ତାନ୍ତର କରାଯାଇଛି। ଯେହେତୁ ସମ୍ବଲପୁରରେ ଏକାଧିକ କେସରେ ତାର ସମ୍ପୃକ୍ତି ରହିଛି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
