ଭୁବନେଶ୍ବର: ଛଉ ନୃତ୍ୟରୁ ଆରମ୍ଭ ହେଲା 9ମ ମୟୂରଭଞ୍ଜ ଉତ୍ସବ । ବୀର ବାଦ୍ୟର ତାଳେ ତାଳେ ମନମୁଗ୍ଧକର ଅଙ୍ଗଭଙ୍ଗୀ ପ୍ରଦର୍ଶନ।ଯେଉଁଥିପାଇଁ ଦେଶ ବିଦେଶରେ ପରିଚିତି ଲାଭ କରିଛି ମୟୂରଭଞ୍ଜର ଛଉ ନୃତ୍ୟ। ସେହି ବୀର ରସପୂର୍ଣ୍ଣ ନୃତ୍ୟର ତାଳେ ତାଳେ ଆରମ୍ଭ ହୋଇଛି ମୟୂରଭଞ୍ଜ ଉତ୍ସବ ।
ଯାହାକି ରାଜଧାନୀର ଲୋକମାନଙ୍କୁ ସତେକି ସେହି ଜଙ୍ଗଲଘେରା ଅଞ୍ଚଳକୁ କିଛି ସମୟ ପାଇଁ ନେଇଯିବା ସହିତ ତାଙ୍କ ଖାଦ୍ୟ,ପରମ୍ପରାରେ ଓ କଳାସଂସ୍କୃତିରେ ଭୁଲାଇ ଦେବାର ଅନୁଭୂତି ଦେଇଛି । ଯେଉଁଥି ପାଇଁ ସହରରେ ରହୁଥିବା ମୟୂରଭଞ୍ଜିଆଙ୍କ ସମେତ ସେମାନଙ୍କୁ ଭଲ ପାଉଥିବା ଲୋକମାନେ ମଧ୍ୟ ସେହି ଅନୁଭୂତିରୁ କାଣିଚାଏ ବାସ୍ନା ବାରିବା ପାଇଁ ଭିଡ଼ ଜମାଉଥିବା ଦେଖାଯାଇଛି।
ଉତ୍କଳ ମଣ୍ଡପରେ 3 ଦିନ ପାଇଁ ଚାଲିବାକୁଥିବା ଏହି ଉତ୍ସବକୁ ରାଜ୍ୟ ଭାଷା ସାହିତ୍ୟ ଓ ସଂସ୍କୃତି ବିଭାଗ ସଚିବ ମନୋରଞ୍ଜନ ପାଣିଗ୍ରାହୀ ମୁଖ୍ୟ ଅତିଥିଭାବେ ଯୋଗଦେଇ ଉଦଘାଟନ କରିଛନ୍ତି। ଅନ୍ୟମାନଙ୍କ ମଧ୍ୟରେ ମୟୂରଭଞ୍ଜ ସାଂସ୍କୃତିକ ସଂସଦର ଅଧ୍ୟକ୍ଷ ଅରୁଣ ରଥ, ପୂର୍ବତନ ସାଂସଦ ଓ ମନ୍ତ୍ରୀ ବିରଭଦ୍ର ସିଂ , ସିନେ ଅଭିନେତା ତଥା ଅନୁଷ୍ଠାନର ଉପସଭାପତି ଉତ୍ତମ ମହାନ୍ତି ପ୍ରମୁଖ ଏହି ଉଦଘାଟନୀ ଉତ୍ସବରେ ଅଂଶଗ୍ରହଣ କରିଥିଲେ। ଏହି ଅବସରରେ ଉତ୍ତମ ମହାନ୍ତି ରାଜଧାନୀର ଜନସାଧାରଣମାନଙ୍କୁ ଏହି ଉତ୍ସବରେ ଯୋଗଦାନ କରି ମନୋରଞ୍ଜନ କରିବା ସହିତ ବାରିପଦାର ପ୍ରସିଦ୍ଧ ମୁଢିମାଂସ,ଦଳା ଖେଚୁଡ଼ି ,ରାମ ରୋଚକ ତରକାରୀ ଏବଂ ମଣ୍ଡା ଓ କାକରାର ମଜ୍ଜା ନେବାକୁ କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ
