ଭଦ୍ରକ: ଜିଲ୍ଲାରେ ଆଜିଠାରୁ ଲାଗୁହେଲା କର୍ଫ୍ୟୁ । ମେ 17 ତାରିଖ ପର୍ଯ୍ୟନ୍ତ ସନ୍ଧ୍ୟା 7ଟାରୁ ସକାଳ 7ଟା ପର୍ଯ୍ୟନ୍ତ ଜିଲ୍ଲାରେ ଏହି କର୍ଫ୍ୟୁ ବଳବତ୍ତର ରହିବ । ଜିଲ୍ଲାର 7 ବ୍ଲକ ଅନ୍ତର୍ଗତ 218 ଟି ପଞ୍ଚାୟତ, 2 ଟି ମ୍ୟୁନିସିପାଲଟି ଓ 2 ଟି ଏନଏସି ଅନ୍ତର୍ଗତ 79 ଟି ୱାର୍ଡରେ ଏହା କଡାକଡି ଭାବେ ପାଳନ କରାଯିବ । ଏନେଇ ଆଜି ଜିଲ୍ଲାପାଳ ଜ୍ଞାନ ଦାସ ସୂଚନା ଦେଇଛନ୍ତି ।
ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାରୁ ରେଡ ଜୋନରେ ରହିଛି ଭଦ୍ରକ । ଏହି ସମୟରେ କେବଳ ଜରୁରୀ ପରିସ୍ଥିତିରେ ଲୋକମାନଙ୍କୁ ଛଡାଯିବ, ନହେଲେ ଏହି ନିୟମ ଭଙ୍ଗ କଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ।
ଜିଲ୍ଲାରେ ଗତକାଲି 2 ଟି ପଜେଟିଭ ବାସୁଦେବପୁର ଓ ଧାମନଗର ବ୍ଲକରେ ବାହାରିଥିଲା । ଅନ୍ୟପଟେ ବର୍ତ୍ତମାନ ବିଭିନ୍ନ ରାଜ୍ୟରୁ ଜିଲ୍ଲାକୁ ପ୍ରବାସୀ ଓଡିଆମାନେ ଆସୁଛନ୍ତି । କିପରି କୋରୋନା ଆକ୍ରାନ୍ତଙ୍କ ସଂଖ୍ୟାକୁ ରୋକିବା ଏବଂ ଲୋକଙ୍କ ନିରାପଦ ପାଇଁ ଏହି କଟକଣା ଲାଗୁ କରାଯାଇଥିବା ଜିଲ୍ଲାପାଳ କହିଛନ୍ତି । ବର୍ତ୍ତମାନ ସୁଦ୍ଧା ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା 21 ରେ ପହଞ୍ଚିଥିବା ବେଳେ ପ୍ରଶାସନ ପକ୍ଷରୁ 20 ଟି ପଞ୍ଚାୟତକୁ କଣ୍ଟେନମେଣ୍ଟ ଜୋନ ଭାବେ ଘୋଷଣା କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
