ଭଦ୍ରକ: ବ୍ୟାଙ୍କ ଜମା ଖାତାଧାରୀଙ୍କ ଅଜାଣତରେ ଜମା ଖାତାରୁ ଟଙ୍କା ହଡପ । ଭାରତ ସରକାର ବ୍ୟାଙ୍କ ସୁବିଧା ସମସ୍ତ ଜନସାଧାରଣ ମାନଙ୍କୁ ଯୋଗାଇ ଦେବା ପାଇଁ ଗ୍ରାହକ ସେବା କେନ୍ଦ୍ରର ବ୍ୟବସ୍ଥା କରିଥିଲେ । ହେଲେ କିଛି ଅସାଧୁ ଗ୍ରାହକ ସେବା କେନ୍ଦ୍ର ଖାତାଧାରୀଙ୍କୁ ବିଭିନ୍ନ ଆଳ ଦେଖାଇ ଠକିବାରେ ଲାଗିଛନ୍ତି । ଏହିପରି ଏକ ଅଭିଯୋଗ ବାସୁଦେବପୁର ଥାନାରେ ହୋଇଛି।
ଖବର ଅନୁଯାୟୀ ବାସୁଦେବପୁର ଥାନା ଅଧିନସ୍ଥ ନୂଆଗାଁ ପଞ୍ଚାୟତର ରେବତୀ ମହାପାତ୍ର ସ୍ଥାନୀୟ ଇରମ ବଜାର ଠାରେ ଥିବା ଗ୍ରାହକ ସେବା କେନ୍ଦ୍ରରେ ତାଙ୍କର ଟଙ୍କା ଉଠାଣ କରନ୍ତି । ତାହାର ସୁଯୋଗ ନେଇ ଗ୍ରାହକ ସେବା କେନ୍ଦ୍ରରେ ରେବତୀଙ୍କ ଅଜାଣତରେ ଖାତାରୁ ଟଙ୍କା ଉଠାଯାଇଥିବା ନେଇ ରେବତୀ ବାସୁଦେବପୁର ଥାନାରେ ଅଭିଯୋଗ କରିଛନ୍ତି ।
ହେଲେ ଏନେଇ ସମ୍ପୃକ୍ତ ଗ୍ରାହକ ସେବା କେନ୍ଦ୍ର କି ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ । ତେବେ ତୁରନ୍ତ ଏହି ବିଷୟରେ ତଦନ୍ତ କରି ନ୍ୟାୟ ଦାବି କରିଛନ୍ତି ରେବତୀଙ୍କ ପରିବାର ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
