ବ୍ରହ୍ମପୁର: ବିଶ୍ବବ୍ୟାପୀ କୋରୋନା ପ୍ରଳୟ ଜାରି ରହିଛି । ଏମିତି ସ୍ଥିତିରେ ଚୀନ ସବୁ ଦେଶର ଟାର୍ଗେଟରେ ରହିଥିବାବେଳେ ଗଲୱାନ ଘାଟିରେ ଭାରତୀୟ ଯବାନଙ୍କ ଉପରେ ଆକ୍ରମଣ ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଉଛି । ଏହି ଅବସରରେ ଗଞ୍ଜାମ ଜିଲ୍ଲା ବିଜେପି ପକ୍ଷରୁ ବ୍ରହ୍ମପୁର ସହରର ଗାନ୍ଧୀନଗର ଛକରେ ଥିବା ମହାତ୍ମାଗାନ୍ଧୀଙ୍କ ପ୍ରତିମୂର୍ତ୍ତି ନିକଟରେ ଶହୀଦ ଯବାନଙ୍କ ସ୍ମୃତି ଉଦ୍ଦେଶ୍ୟରେ ଶ୍ରଦ୍ଧାଞ୍ଜଳୀ ଦିଆଯାଇଛି । ଏଥିସହ 2 ମିନିଟ୍ ନୀରବ ପ୍ରାର୍ଥନା କରାଯାଇଛି ।
ପରେ ଏକ ପଦଯାତ୍ରାରେ ସହରର ପୁରୁଣା ବସଷ୍ଟାଣ୍ଡଠାରେ ପହଞ୍ଚି ସମସ୍ତେ ଏଭଳି ପରିସ୍ଥିତିରେ ଚାଇନା ସାମଗ୍ରୀ ବର୍ଜନ କରିବା ପାଇଁ ଶପଥ ନେବା ସହ ଚାଇନାର ରାଷ୍ଟ୍ରପତି ଜିନପିଙ୍ଗଙ୍କ କୁଶପୁତ୍ତଳିକା ଦାହ କରିଥିଲେ । ଏହାସହିତ ଦୈନଦିନ ଜୀବନରେ ବ୍ୟବହାର ହେଉଥିବା ଚାଇନା ସାମଗ୍ରୀକୁ ମଧ୍ୟ ପୋଡାଯାଇଥିଲା । ତେବେ ପ୍ରତ୍ୟେକ ଦେଶବାସୀ ଚାଇନା ସାମଗ୍ରୀ ବର୍ଜନ କରିବାକୁ ଆହ୍ବାନ ମଧ୍ୟ କରାଯାଇଥିଲା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
