ବ୍ରହ୍ମପୁର: ଘରୋଇ ହସପିଟାଲକୁ ବିକ୍ରି କରିବା ନାମରେ ଠକେଇ ହୋଇଥିବା ଘଟଣାରେ ୩ ଗିରଫ । ବ୍ରହ୍ମପୁର ସହରର ବୈଦ୍ୟନାଥପୁର ଥାନା ଅନ୍ତର୍ଗତ ଭାବାନଗର ଠାରେ ରହିଥିବା ଆପୋଲୋ କ୍ଲିନିକ କୋଠାକୁ ଜାଲ ଲିଜ ଏଗ୍ରିମେଣ୍ଟ କରି ଠକେଇ ହୋଇଥିବା ଅଭିଯୋଗ ହୋଇଥିଲା । ତେବେ ଏହି ଘଟଣାରେ ଆଉ କାହାର ସମ୍ପୃକ୍ତି ରହିଛି ତାହାକୁ ନେଇ ପୋଲିସ ପକ୍ଷରୁ ତଦନ୍ତ ଜାରି ରହିଛି ।
ସୂଚନା ଅନୁସାରେ, ଗତ ଜୁନ ୧୨ ତାରିଖରେ ଡାକ୍ତର ରମେଶ ଚନ୍ଦ୍ର ବାରତା ଏନେଇ ଥାନାରେ ଅଭିଯୋଗ କରିଥିଲେ । ସେ ସ୍ପେସିମେନ ହୋଲଡିଂ ଲିମିଟେଡ ନାମକ ଏକ କମ୍ପାନୀରୁ ପ୍ରାୟ ୫ କୋଟି ଟଙ୍କା ଦେଇ ଆପୋଲୋ କ୍ଲିନିକ କ୍ରୟ କରିବା ପରେ ତାଙ୍କୁ ସେଠାରେ ଅନୁମତି ଦିଆଯାଉନଥିବା ଅଭିଯୋଗ କରିଥିଲେ । ତେବେ ସେ ଏହାକୁ କିଣିବା ପରେ ତାଙ୍କ ଅଜାଣତରେ ଏହି କୋଠାକୁ ଲିଜ୍ ଆକାରରେ ଦିଆଯାଇଥିବା ଜାଣିବାକୁ ପାଇଥିଲେ । ପରେ ଡାକ୍ତର ବାରତାଙ୍କୁ ଜଣେ ବ୍ୟକ୍ତିଙ୍କ ସହିତ ମିଶି ବ୍ୟବସାୟ କରିବାକୁ କମ୍ପାନୀ ପକ୍ଷରୁ ବାଧ୍ୟ କରାଯାଇଥିଲା ।
ଏହାପରେ ଓମ୍ ଆରୋଗ୍ୟ ହସପିଟାଲ ପ୍ରାଇଭେଟ୍ ଲିମିଟେଡର ନିର୍ଦ୍ଦେଶିକା ନିଶି ପ୍ରିୟଦର୍ଶନୀଙ୍କ ସହିତ ଏକ ଜଏଣ୍ଟ କମ୍ପାନୀ କରି ଆପୋଲୋ ହସ୍ପିଟାଲ କିଣିଥିଲେ ଡାକ୍ତର ବାରତା । ତେବେ ସେମାନେ ଏହାକୁ ନିଜ ଅକ୍ତିଆରକୁ ନେବା ପାଇଁ ଉଦ୍ୟମ କରୁଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଥିବା ବ୍ରହ୍ମପୁର ଏସପି ପ୍ରକାଶ କରିଛନ୍ତି । ବର୍ତ୍ତମାନ ସୁଦ୍ଧା ନିଶି ପ୍ରିୟଦର୍ଶନୀଙ୍କ ସମେତ ସ୍ପେସିମେନ୍ ହୋଲଡିଂ ଲିମିଟେଡର ପରିଚାଳକ ସଂଗ୍ରାମ କେଶରୀ ମହାନ୍ତି ଓ ବେଲଗୁଣ୍ଠା କଂସାରୀ ସାହିର ବଦ୍ରିନାରାୟଣ ପାତ୍ରଙ୍କୁ ପୋଲିସ ଏହି ଘଟଣାରେ ଗିରଫ କରିଛି ।
ଇଟିଭି ଭାରତ, ବ୍ରହ୍ମପୁର
