ବ୍ରହ୍ମପୁର: ଦକ୍ଷିଣ ଓଡ଼ିଶାର ଅଗ୍ରଣୀ ସ୍ବେଚ୍ଛାସେବୀ ସଂଗଠନ ବ୍ରହ୍ମପୁର ସହରର ଟିମ କ୍ଲିନ ସିଟିକୁ ମିଳିଲା ବଡ଼ ଉପଲବ୍ଧି । ସାପ୍ତାହିକ ସେବା କାର୍ଯ୍ୟକ୍ରମରେ ଗୋଟିଏ ଦିନରେ ଟିମ୍ ସଦସ୍ୟଙ୍କ ଦ୍ୱାରା ୩ ଜଣ ନିରାଶ୍ରୟଙ୍କୁ ରାସ୍ତାକଡ଼ରୁ ଉଦ୍ଧାର କରି ସେବା ପ୍ରଦାନ କରାଯାଇଛି । ଏହି କ୍ରମରେ ଏହି ସ୍ବେଚ୍ଛାସେବୀ ସଂଗଠନ ମୋଟ ୧୦୦ ଜଣଙ୍କୁ ସେବା ପ୍ରଦାନ ଲକ୍ଷ୍ୟ ପୂରଣ କରିଛି । ଶନିବାର ଗୋପାଳପୁର ଛକ ନିକଟବର୍ତ୍ତୀ ଓଭର ବ୍ରିଜ ତଳେ ଜୀବନ ବିତାଉଥିବା ଜନୈକ ଅଣ ଓଡ଼ିଆ ବ୍ୟକ୍ତିଙ୍କୁ ସହାୟତାର ହାତ ବଢାଇଥିଲା ଟିମ୍ କ୍ଲିନ ସିଟି ।
ସର୍ବ ପ୍ରଥମେ ଏହି ସ୍ବେଚ୍ଛାସେବୀ ସଂଗଠନର ସଦସ୍ୟ ମାନେ MKCG ମେଡିକାଲ୍ ଗେଟ ନିକଟରୁ ବାହାରି ଗେଟ୍ବଜାର ଛକରୁ ପ୍ରଥମେ ଛତ୍ରପୁରର ବିଜୟ କୁମାର ପଟ୍ଟନାୟକଙ୍କୁ ଉଦ୍ଧାର କରିଥିଲା । ଋଣଗ୍ରସ୍ତ ବିଜୟଙ୍କ ଘରକୁ ବ୍ୟାଙ୍କ ପକ୍ଷରୁ ଜବତ କରାଯିବା ପରେ ସେ ଘରଛାଡ଼ି ଏଣେତେଣେ ବୁଲି ଖୋଲା ଆକାଶ ତଳେ ଜୀବନ କାଟୁଥିଲେ । ସେହିଭଳି ଦ୍ୱିତୀୟ ଵ୍ୟକ୍ତି ରହିଥିଲେ କେ. ଡିଲି ଯାହାଙ୍କୁ ଉଦ୍ଧାର କରିଥିଲା ଟିମ କ୍ଲିନ ସିଟି । ତାଙ୍କୁ ସେବା ପ୍ରଦାନ କରିବା ପରେ ସବ-ରେଜିଷ୍ଟ୍ରାର କାର୍ଯ୍ୟାଳୟ ନିକଟରୁ ସୁକାଦେବ ସାହୁ ଯାହାଙ୍କ ଘର ବ୍ରହ୍ମପୁର ଉପକଣ୍ଠ ଭାବିନିପୁରରେ ତାଙ୍କୁ ସେବା ଯୋଗାଇ ଦିଆଯାଇଥିଲା ।
ଉଦ୍ଧାର ତିନି ଜଣଙ୍କ ଚୁଟି ଓ ଦାଢ଼ି କାଟି ସଫାସୁତରା କରାଯିବା ପରେ ସମସ୍ତଙ୍କୁ ନୂତନ ବସ୍ତ୍ର ପରିଧାନ କରାଇ ଖାଇବାକୁ ଯୋଗାଇ ଦିଆଯାଇଥିଲା । ଟିମ ସଦସ୍ୟଙ୍କ ଠାରୁ ସହାୟତା ପାଇ ଉଦ୍ଧାର ପାଇଥିବା ବ୍ୟକ୍ତି ଖୁସି ଜାହିର କରିଛନ୍ତି ।
ସେପଟେ ଆଗକୁ ଏଭଳି କାର୍ଯ୍ୟ ଜାରି ରଖିବା ସହ ନୂତନ ବର୍ଷରେ ନୂଆ ଯୋଜନା ସହ ସମାଜରେ ସେବା ପ୍ରଦାନ କରିବାକୁ ନିଷ୍ପତ୍ତି ନେଇଛି ଟିମ କ୍ଲିନ ସିଟି । ଏହି କାର୍ଯ୍ୟକ୍ରମରେ ଟିମର ବହୁ ସଦସ୍ୟ ସକ୍ରିୟ ସାମିଲ ହୋଇଛନ୍ତି । ଏଭଳି କାର୍ଯ୍ୟରେ ନିଜକୁ ସାମିଲ କରି ଅନେକ ନିଜକୁ ଗର୍ବିତ ବୋଲି କହିଛନ୍ତି ଟିମ କ୍ଲିନ ସିଟିର ସଦସ୍ୟ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
