ବ୍ରହ୍ମପୁର: ଡାକ୍ତର ହେବ ତ ଏମିତି । ଏଭଳି ଚର୍ଚ୍ଚା ଚାଲିଛି ରେଶମ ସହର ବ୍ରହ୍ମପୁରରେ । ଶୁକ୍ରବାର ସହରର ରାସ୍ତା କଡ଼ରେ ପ୍ରସବ ଯନ୍ତ୍ରଣା ପାଉଥିବା ଗର୍ଭବତୀ ମହିଳାଙ୍କୁ ଦେବଦୂତ ସାଜି ପ୍ରସବ କରାଇଥିବା ଦୁଇ ଡାକ୍ତରଙ୍କ କାର୍ଯ୍ୟକୁ ନେଇ ବିଭିନ୍ନ ମହଲରେ ପ୍ରଶଂସା କରାଯାଉଛି । ରାସ୍ତାକଡରେ ପ୍ରସବ କରାଇ ଏହି ଦୁଇ ଡାକ୍ତର ଅନ୍ୟମାନଙ୍କ ପାଇଁ ପଲଟିଛନ୍ତି ଉଦାହରଣ ।
ବ୍ରହ୍ମପୁର କୋଟପେଟା ଛକରେ ମହିଳା ଜଣଙ୍କ ରାସ୍ତା କଡରେ ପଡିରହି ଗର୍ଭ ଯନ୍ତ୍ରଣା ପାଉଥିଲେ । ସେଠାରେ କୌଣସି ଆମ୍ବୁଲାନ୍ସ ପହଞ୍ଚି ନଥିଲା । ଏହି ସମୟରେ ଘଟଣାସ୍ଥଳ ଦେଇ ଯାଉଥିବା ଏମ୍.କେ.ସି.ଜି ମେଡିକାଲର ଡାକ୍ତର ଦେବଦର୍ଶନୀ ସାହୁ ସେଠାରେ ପହଞ୍ଚିଥିଲେ । ପରେ ସେଠାକାର ସ୍ଥିତିକୁ ଦେଖି ସୁରକ୍ଷିତ ପ୍ରସବ କରାଇବା ପାଇଁ ଦେବଦର୍ଶନୀ ନିଜର ସହଯୋଗୀ ଡାକ୍ତର ରୁନାକ ଗାନ୍ଧୀଙ୍କୁ ଘଟଣାସ୍ଥଳକୁ ଡାକିଥିଲେ । ପରେ ସେଠାରେ ଉପସ୍ଥିତ ଥିବା କିଛି ସ୍ଥାନୀୟ ମହିଳା ଓ ବାଟରେ ଯାଉଥିବା କିଛି ନର୍ସଙ୍କ ସହାୟତାରେ ପ୍ରସବ କାର୍ଯ୍ୟ ସମ୍ପାଦନ କରିଥିଲେ ଦୁଇ ଡାକ୍ତର ।
ତେବେ ସୁରକ୍ଷିତ ଭାବେ କିଭଳି ରାସ୍ତା କଡରେ ମହିଳାଙ୍କ ପ୍ରସବ କରାଇଥିଲେ ଡାକ୍ତର, ଏନେଇ ତାଙ୍କ ସହ ଆଲୋଚନା କରିଛନ୍ତି ଆମ ସମ୍ବାଦଦାତା...
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
