ବ୍ରହ୍ମପୁର: ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକର ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଛନ୍ତି ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ । ଦିନିକିଆ ବ୍ଲକ ଗ୍ରସ୍ତ କରି ପ୍ରକଳ୍ପ ନିର୍ଦ୍ଦେଶକ ସିନ୍ଧେ ଦତ୍ତାତ୍ରେୟ ଭାଉସାହେବ ବିଭିନ୍ନ ପଞ୍ଚାୟତରେ ଜାରି ରହିଥିବା ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିଛନ୍ତି ।
ପ୍ରକଳ୍ପ ନିର୍ଦ୍ଦେଶକ ପ୍ରଥମେ ଦିଗପହଣ୍ଡି ବ୍ଲକ କାର୍ଯ୍ୟାଳୟରେ ପହଞ୍ଚି ସ୍ଥାନୀୟ ବିଡିଓ ହଳଧର ଶବରଙ୍କ ସହ ବ୍ଲକର ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମ୍ପର୍କରେ ଆଲୋଚନା କରିବା ପରେ ବ୍ଲକର କୋଟିନଡା, ସିଦ୍ଧେଶ୍ବର, ଗୋକର୍ଣ୍ଣପୁର , କୁଶପଡା ଓ ଆଙ୍କୋରଡା ପଞ୍ଚାୟତରେ ପହଞ୍ଚିଥିଲେ ।
ସେଠାକାର ସ୍ଥାନୀୟ ସରପଞ୍ଚଙ୍କ ଉପସ୍ଥିତିରେ ପଞ୍ଚାୟତରେ ମହାତ୍ମାଗାନ୍ଧୀ ଜାତୀୟ କର୍ମ ନିଯୁକ୍ତି ଯୋଜନାରେ ଆରମ୍ଭ ହୋଇଥିବା ଆଦର୍ଶ ପୋଖରୀ , ଆଦର୍ଶ ଗୁହାଳ ଏବଂ ନବନିର୍ମିତ ଗ୍ରାମାଞ୍ଚଳ ପାର୍କ ଗୁଡିକ ପରିଦର୍ଶନ କରି ଏହାର ସ୍ଥିତି ଅନୁଧ୍ୟାନ କରିଥିଲେ । ପରେ ପଞ୍ଚାୟତରେ ଲାଗି ରହିଥିବା କାର୍ଯ୍ୟଗୁଡିକର ତ୍ବରାନ୍ବିତ ପ୍ରକ୍ରିୟାରେ ଶେଷ କରିବା ନିମନ୍ତେ ସ୍ଥାନୀୟ ବିଡିଓ ଓ ସରପଞ୍ଚମାନଙ୍କୁ ନିର୍ଦ୍ଦେଶ ଦେଇଥିଲେ । ପ୍ରକଳ୍ପ ନିର୍ଦ୍ଦେଶକଙ୍କ ଏହି ସମୀକ୍ଷା ସମୟରେ ପଞ୍ଚାୟତ ସମିତି ଓ ପଞ୍ଚାୟତର ବହୁ ଅଧିକାରୀ ଉପସ୍ଥିତ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
