ବ୍ରହ୍ମପୁର: ଲକଡାଉନ୍ ସମୟରେ ସୁରଟରୁ ଗଞ୍ଜାମ ଫେରିଥିଲେ ହଜାର ହଜାର ଶ୍ରମିକ । କୋଭିଡ୍ ଭୟରେ ଅନେକ ନିଜ ଗ୍ରାମରେ ଦୀର୍ଘ ଦିନ ଧରି ଅନେକ ଦୁଃଖ କଷ୍ଟରେ ରହିଲେ । ହେଲେ ସରକାରଙ୍କ ଅନଲକ୍ ପରେ କେତେକ ପ୍ରବାସୀ ଓଡିଆ ସରକାରଙ୍କ ଶ୍ରମିକ ସ୍ବତନ୍ତ୍ର ଟ୍ରେନରେ ବାହାରିଥିଲେ ନିଜ କର୍ମକ୍ଷେତ୍ରକୁ । ହେଲେ ଅନେକ ଅର୍ଥ ଅଭାବରୁ ଅଟକି ରହିଯାଇଥିଲେ ନିଜ ଅଞ୍ଚଳରେ । ଆଉ ଶେଷରେ ପ୍ରବାସୀ ଶ୍ରମିକ ସୁରକ୍ଷା ମଞ୍ଚର ସହାୟତାରେ ଏକ ସ୍ବତନ୍ତ୍ର ଟ୍ରେନରେ ଏମାନଙ୍କୁ ସୁରଟକୁ ନିଆଯାଇଛି ।
ନିଜେ ଏବଂ ନିଜର ପରିବାରକୁ କୋରୋନା କାଳରେ ଟିକେଟ୍ କରି ଯିବାକୁ ଅସମର୍ଥ ରହିଥିବା ଗଞ୍ଜାମର ବହୁ ପ୍ରବାସୀ ଓଡିଆ ପରିବାର ଶେଷରେ ଏହି ସ୍ବତନ୍ତ୍ର ଟ୍ରେନ ଯୋଗେ ବ୍ରହ୍ମପୁରରୁ ବାହାରି ସୁରଟ ଯାଇଛନ୍ତି । ଦୀର୍ଘ ଦିନ ଧରି ନିଜ ଅଞ୍ଚଳରେ ରହି କୌଣସି କାର୍ଯ୍ୟ ନମଳିବାରୁ ଶେଷରେ ବାଧ୍ୟ ହୋଇ ସୁରଟକୁ ଯାତ୍ରା କରୁଥିବା କହିଛନ୍ତି ଅନେକ ପ୍ରବାସୀ ଓଡିଆ ।
ବ୍ରହ୍ମପୁରରୁ ସୁରଟ ଅଭିମୁଖେ ଯାଇଥିବା ଏହି ସ୍ବତନ୍ତ୍ର ପାୱାର ଲୁମ୍ ଏକ୍ସପ୍ରେସରେ ପ୍ରାୟ 13 ଶହରୁ ଉର୍ଦ୍ଧ୍ବ ପ୍ରବାସୀ ଓଡିଆ ଯାତ୍ରା କରିଛନ୍ତି । ପ୍ରବାସୀ ଶ୍ରମିକ ସୁରକ୍ଷା ମଞ୍ଚର ସହାୟତାରେ ଗଞ୍ଜାମ ଜିଲ୍ଲାର ବିଭିନ୍ନ ଗ୍ରାମାଞ୍ଚଳର ବ୍ୟକ୍ତିବିଶେଷଙ୍କୁ ନେବା ପାଇଁ ଉଦ୍ୟମ କରାଯାଇଥିବାବେଳେ ଏଥିପାଇଁ ଏକ ବ୍ୟାଙ୍କ ପକ୍ଷରୁ ସହାୟତା ପ୍ରଦାନ କରାଯାଇଥିବା କହିଛନ୍ତି ଏହାର କର୍ମକର୍ତ୍ତା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
