ବ୍ରହ୍ମପୁର: ଏବେ ଲୋକଙ୍କ ଉପରେ ଦାଉ ସାଧୁଛି କୋରୋନାର ଦ୍ବିତୀୟ ଲହର । ଆଜକୁ 3 ରୁ 4 ମାସ ହେଇଗଲା । ହାତ ବାନ୍ଧି ଘରେ ବସି ରହିଛନ୍ତି ପ୍ରବାସୀ । ତେବେ କୋରୋନାର ଦ୍ୱିତୀୟ ଲହରରେ ଦେଶ ଠାରୁ ଆରମ୍ଭ କରି ରାଜ୍ୟରେ ସଂକ୍ରମଣର ମାତ୍ରା କମିବା ପରେ ପୁଣି ସୁରଟ ମୁହାଁ ଗଞ୍ଜାମର ପ୍ରବାସୀ ଓଡିଆ । କୋରୋନାର ଭୟାବହତାକୁ ଦେଖି ନିଜର ଓ ନିଜ ପରିବାରର ଜୀବନ ବଞ୍ଚାଇବା ପାଇଁ ସୁରତରୁ ନିଜ ଜନ୍ମମାଟିକୁ ଫେରିଥିଲେ । ଯାହାକିଛି ରୋଜଗାର କରି ଆଣିଥିଲେ ଏବା ତାହା ଶେଷ। ଉପରେ ନିଜ ଅଞ୍ଚଳରେ କାମଧନ୍ଦା ନଥିବାରୁ ଏବେ ସମସ୍ତେ ବେକାର। ପରିବାର ମୁହଁରେ ଦାନା ଟିକେ ଦେବା ପାଇଁ ପାଖରେ ନାହିଁ ଅର୍ଥ । ଶେଷରେ ନିରୁପାୟ ହୋଇ ପୁଣିଥରେ ସୁରତ ମୁହାଁ ହୋଇଛନ୍ତି ପ୍ରବାସୀ ଓଡ଼ିଆ ଶ୍ରମିକ। ଏଥିପାଇଁ ବ୍ରହ୍ମପୁର ରେଳ ଷ୍ଟେସନରେ ଦେଖିବାକୁ ମିଳିଛି ଲୋକଙ୍କ ଅସମ୍ଭାଳ ଭିଡ଼।
ଇଏ ହେଉଛନ୍ତି ଜଣେ ଓଡିଆ ଘରର ଶିକ୍ଷିତ ଯୁବତୀ । ଘର ଗଞ୍ଜାମ ଜିଲ୍ଲାର ବେଲଗୁଣ୍ଠା ବ୍ଲକ ଅନ୍ତର୍ଗତ ଇଙ୍ଗିନାଠି ପଞ୍ଚାୟତରେ । ଯୁକ୍ତ ତିନି ଶିକ୍ଷା ଶେଷ ପରେ ନିଜ ଅଞ୍ଚଳରେ କୌଣସି କାର୍ଯ୍ୟ ନପାଇ ଶେଷରେ ବାହାରିଛନ୍ତି ସୁରଟ ଅଭିମୁଖେ । ଗୋଟିଏ ପଟେ କୋଭିଡର ଭୟ ଏବଂ ଅନ୍ୟପଟେ ପେଟର ଭୋକ । ଏଭଳି ସ୍ଥିତିରେ ସୁରଟ ଯାଇ କାର୍ଯ୍ୟ କରିବାକୁ ମନସ୍ତ କରିଛନ୍ତି ଯବତୀ ଜଣକ । ଏଭଳି ଗଞ୍ଜାମ ଜିଲ୍ଲାର ଅନେକ ଯୁବକ /ଯୁବତୀ କୋରୋନାର ଦ୍ବିତୀୟ ଲହରର ସଂକ୍ରମଣ ଟିକେ କମିବା ପରେ ବାହାରିଛନ୍ତି ନିଜର କର୍ମସ୍ଥଳକୁ । ମୁଖ୍ୟତଃ ଗଞ୍ଜାମ ଜିଲ୍ଲାର ବହୁ ଗ୍ରାମାଞ୍ଚଳର ପ୍ରବାସୀ ଓଡିଆ ମାନେ ସୁରଟ ଉପରେ ନିର୍ଭର କରୁଥିବା ବେଳେ ସ୍ଥିତିରେ ସାମାନ୍ୟ ସୁଧାର ଆସିବା ପରେ ସୁରତ ଫେରିବା ପାଇଁ ଆରମ୍ଭ କରିଦେଇଛନ୍ତି ପ୍ରସ୍ତୁତି ।
କୋରୋନା ରୂପକ ମହାମାରୀର ଆରମ୍ଭ ସମୟରୁ ଅଦ୍ୟାବଧି ପର୍ଯ୍ୟନ୍ତ ଏହି ପ୍ରବାସୀ ଓଡିଆ ମାନେ ଅନେକ ଦୁଃଖ ଓ କଷ୍ଟ ପାଇଥିବା ବେଳେ ଦୀର୍ଘଦିନ ଧରି ନିଜ ଜନ୍ମମାଟିରେ ବସି ରହିଥିଲେ ମଧ୍ୟ କୌଣସି କର୍ମସଂସ୍ଥାନ ପାଇନଥିଲେ । ଶେଷରେ କୋଭିଡ ଯୋଗୁଁ କିଏ ନିଜର ପରିବାରକୁ ନିଜ ଗ୍ରାମରେ ଛାଡି ଯିବା ପାଇଁ ବାହାରିଛି ତ ଆଉ କିଏ ପରିବାରକୁ ସାଙ୍ଗରେ ନେଇ ବାହାରିଛନ୍ତି । ଆଗକୁ କୋରୋନାର ତୃତୀୟ ଲହର ଆସିବ ବୋଲି କରାଯାଉଛି ଆଶଙ୍କା। ଏହାସତ୍ତ୍ବେ ଗଞ୍ଜାମ ଜିଲ୍ଲାରୁ ହଜାର ହଜାର ଶ୍ରମିକ ଏବେ ବିଭିନ୍ନ ରାଜ୍ୟକୁ ଯାଉଛନ୍ତି। କାରଣ ସମସ୍ତଙ୍କୁ ନିଜ ପରିବାର ଭରଣପୋଷଣ ଚିନ୍ତା। ଓଡ଼ିଶାରେ କୌଣସି କାମଧନ୍ଦା ନ ମିଳିବାରୁ ଦୀର୍ଘ ଦିନ ପରେ ବାଧ୍ୟ ହୋଇ କାର୍ଯ୍ୟସ୍ଥଳକୁ ଫେରୁଛନ୍ତି ପ୍ରବାସୀ ଓଡିଆ ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
