ବ୍ରହ୍ମପୁର: ରାସ୍ତା ନିର୍ମାଣରେ ଅହେତୁକ ବିଳମ୍ବ ଯୋଗୁଁ ଅସୁବିଧାରେ ସାଧାରଣ ଲୋକେ । ଏହି ଘଟଣା କେଉଁ ଗ୍ରାମାଞ୍ଚଳର ନୁହେଁ ରାଜ୍ୟର ଏକ ପ୍ରମୁଖ ସହରର । ବ୍ରହ୍ମପୁର ସହରର ଆମ୍ବମାର୍କେଟ ଠାରୁ ଗିରି ମାର୍କେଟ ପର୍ଯ୍ୟନ୍ତ ରାସ୍ତା ନିର୍ମାଣ କାର୍ଯ୍ୟ ଚାଲିଛି । ଏହି ରାସ୍ତାକୁ ଦୁଇ ଲେନ୍ କରିବା ପାଇଁ କାର୍ଯ୍ୟାଦେଶ ଦିଆଯାଇଛି । ନିର୍ଦ୍ଦିଷ୍ଟ ସମୟ ଅବଧି ମଧ୍ୟ ରହିଛି । ମାତ୍ର ସବୁକୁ ଫୁ କରି ଠିକାଦାର ଖାମଖିଆଲ ନୀତି ଚଳାଇଛନ୍ତି । ଫଳରେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।
ମହାନଗର ନିଗମ ପକ୍ଷରୁ ରାସ୍ତାର ପାର୍ଶ୍ବରେ ନାଳ ତିଆରି କରାଯାଇଛି । ରାସ୍ତାର ଗୋଟିଏ ପାର୍ଶ୍ବକୁ ଖୋଳି ଦିଆଯାଇଛି । ଫଳରେ ପ୍ରେମନଗର ମୁଖ୍ୟ ରାସ୍ତାରେ ରହୁଥିବା ଜନସାଧାରଣ ଘରୁ ବାହାରିବା ଏକ ପ୍ରକାର ମୁସ୍କିଲ ହୋଇପଡିଛି । ଏପରିକି ନିଜ ଘରୁ ରାସ୍ତା ଉପରକୁ ଆସିବା ପାଇଁ, ପ୍ରାୟ ୧୦ ରୁ ୧୫ ଫୁଟ ଗାତ ଦେଇ ଏକ କାଠ ପଟା ଉପରେ ଚାଲି ଆସୁଥିବା ଦେଖାଯାଇଛି ।
ବର୍ଷା ହେଲେ ରାସ୍ତା ଉପରେ ପୋଖରୀର ଭ୍ରମସୃଷ୍ଟି ହେଉଛି । ଫଳରେ ଅନେକ ଘରୁ ବାହାରିବା ନେଇ ଭୟଭୀତ ହୋଇପଡିଛନ୍ତି । ଅନେକ ଛୋଟବଡ ଦୁର୍ଘଟଣା ଘଟୁଥିବା କଥା ମଧ୍ୟ ସାମ୍ନାକୁ ଆସିଛି । ରାସ୍ତା କାର୍ଯ୍ୟରେ ବହୁ ବିଳମ୍ବ ନେଇ କ୍ଷୋଭ ପ୍ରକାଶ କରିଛନ୍ତି ସ୍ଥାନୀୟ ଲୋକେ । ଏଥିସହିତ ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରିବାକୁ ମଧ୍ୟ ଦାବି ହୋଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
