ବ୍ରହ୍ମପୁର: ଖଲ୍ଲିକୋଟ କଲେଜର ଇତିହାସ ନଷ୍ଟ ନକରିବା ସହ ବର୍ଦ୍ଧିତ ଘର ଟିକସ ଆଦାୟକୁ ବିରୋଧ କରିଛି ଗଞ୍ଜାମ କଂଗ୍ରେସ । ଏନେଇ ସ୍ଥାନୀୟ ବାପୁଜୀ ଆଶ୍ରମ ପରିସରରେ ସାମ୍ବାଦିକ ସମ୍ମିଳନୀ କରି ବର୍ଷିଛି ଜିଲ୍ଲା କଂଗ୍ରେସ । ଦୀର୍ଘ ଦିନର ବ୍ୟବଧାନ ପରେ ବ୍ରହ୍ମପୁର ମହାନଗର ନିଗମ(Berhampur Municipal Corporation-BeMC) ଆଦାୟ କରୁଥିବା ବର୍ଦ୍ଧିତ ଘର ଟିକସକୁ ନିନ୍ଦା କରିଛି ଦଳ । କଂଗ୍ରେସ ନେତା ପୀତବାସ ପଣ୍ଡା କହିଛନ୍ତି ଯେ, "ଦୀର୍ଘ ଦିନର ବ୍ୟବଧାନ ପରେ ବ୍ରହ୍ମପୁର ମହାନଗର ନିଗମ ଯେଉଁଭଳି ଭାବେ ବର୍ଦ୍ଧିତ ଘର ଟିକସ ଆଦାୟ କରୁଛି ତାହା ନିନ୍ଦନୀୟ ।"
କଂଗ୍ରେସ ନେତା ଆହୁରି ଅଭିଯୋଗ କରିଛନ୍ତି ଯେ, "ଏହି ଘଟଣା ଉଚ୍ଚ ନ୍ୟାୟାଳୟରେ( High Court ) ବିଚାରଧୀନ ରହିଛି ଓ ନ୍ୟାୟାଳୟ ପୁରୁଣା ଦରରେ ଟିକସ ଆଦାୟ କରିବା ସହ ବର୍ଦ୍ଧିତ ଟିକସ ଆଦାୟକୁ ସ୍ଥଗିତ ରଖିବା ପାଇଁ ନିର୍ଦ୍ଦେଶ ଦେଇଥିଲେ । ମାତ୍ର ପୁଣି ଥରେ ବର୍ଦ୍ଧିତ ଟିକସ ଆଦାୟ କରାଯାଉଛି । ଆଗାମୀ ୩ ତାରିଖରେ ଏ ନେଇ କଂଗ୍ରେସ ପକ୍ଷରୁ ମହାନଗର ନିଗମ କାର୍ଯ୍ୟାଳୟ ଘେରାଉ କରାଯିବ ।"
ଏହାସହ ବ୍ରହ୍ମପୁର ସହରର ଖଲ୍ଲିକୋଟ କଲେଜ ୧୪୪ ବର୍ଷର ମହାବିଦ୍ୟାଳୟ ହୋଇଥିବାବେଳେ ବର୍ତ୍ତମାନ ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଏହାର ଇତିହାସ ନଷ୍ଟ କରିବାକୁ ବସିଥିବା ଅଭିଯୋଗ କରିଛି କଂଗ୍ରେସ । ଗତବର୍ଷଠାରୁ ଏହାର ଇତିହାସ ନଷ୍ଟ କରିବା ପାଇଁ ପ୍ରଚେଷ୍ଟା ଆରମ୍ଭ କରାଯାଉଛି । କଂଗ୍ରେସ ସମେତ ବିଭିନ୍ନ ଅନୁଷ୍ଠାନ ପକ୍ଷରୁ ଏହାକୁ ବିରୋଧ କରାଯାଇଥିଲା । ସେତେବେଳେ ଖଲ୍ଲିକୋଟ ଏକକ ବିଶ୍ବବିଦ୍ୟାଳୟର କୁଳପତି ଖୁବଶୀଘ୍ର ସଂଶୋଧନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ।
ସୂଚନା ଅନୁସାରେ, କିଛି ବର୍ଷ ତଳେ ଏହାକୁ ଖଲ୍ଲିକୋଟ ସ୍ଵୟଂ ଶାସିତ ମହାବିଦ୍ୟାଳୟରୁ ଖଲ୍ଲିକୋଟ କ୍ଲଷ୍ଟର ବିଶ୍ଵବିଦ୍ୟାଳୟରେ ପରିଣତ କରାଯାଇଥିଲା । ଗତ ବର୍ଷ ରାଜ୍ୟ ସରକାରଙ୍କ ଶିକ୍ଷା ବିଭାଗ ପକ୍ଷରୁ ଏହାକୁ ଖଲ୍ଲିକୋଟ ଏକକ ବିଶ୍ବବିଦ୍ୟାଳୟ ଭାବେ ଘୋଷଣା କରାଯାଇଥିଲା । ଏହି ମହାବିଦ୍ୟାଳୟ ୧୮୭୮ ମସିହାରୁ ଶିକ୍ଷା କ୍ଷେତ୍ରରେ ରାଜ୍ୟରେ ପ୍ରମୁଖ ସ୍ଥାନ ଗ୍ରହଣ କରିଆସିଛି । ତେବେ ଏହାର ଇତିହାସର ମୁକସାକ୍ଷୀ ରହିଥିବା ମୁଖ୍ୟ ଫାଟକର ନାମ ସହିତ ଏହାର ଏଷ୍ଟାବ୍ଲିଷମେଣ୍ଟକୁ ଲିଭାଇ ଦିଆଯାଇଛି ।
ଯାହାଦ୍ଵାରା ବର୍ତ୍ତମାନ ସରକାର ଏହାର ଇତିହାସ ନଷ୍ଟ କରିବାକୁ ବସିଛନ୍ତି । ତୁରନ୍ତ ଏହାକୁ ପରିବର୍ତ୍ତନ କରିବା ସହ ପୂର୍ବ ପରି ରଖିବାକୁ କଂଗ୍ରେସ ଦାବି କରିଛି । ଏହା ସହ ଯଦି କିଛି ଦିନ ମଧ୍ୟରେ ଏହା ପୂରଣ ନହୁଏ, ତେବେ ଆସନ୍ତା ୪ ତାରିଖରୁ କଂଗ୍ରେସ ସତ୍ୟାଗ୍ରହ କରିବ ବୋଲି ଚେତାବନୀ ଦେଇଛି ।
ଇଟିଭି ଭାରତ, ବ୍ରହ୍ମପୁର
