ବ୍ରହ୍ମପୁର: ଗଞ୍ଜାମ ଜିଲ୍ଲାର ବିଭିନ୍ନ କୋଭିଡ କେୟାର ସେଣ୍ଟରର ଅବ୍ୟବସ୍ଥା ସମ୍ପର୍କରେ ସାମାଜିକ ଗଣମାଧ୍ୟମରେ ଭିଡିଓ ଭାଇରାଲ ପରେ ଜିଲ୍ଲାପ୍ରଶାସନ ପକ୍ଷରୁ କଡା ପଦକ୍ଷେପ ଗ୍ରହଣ କରାଯାଇଛି । ବିଶେଷକରି ପାରଳା ମହାରାଜା କୋଭିଡ କେୟାର ସେଣ୍ଟରରେ ଖାଦ୍ୟକୁ ନେଇ ଅଭିଯୋଗ ହୋଇଥିବାରୁ ଫୁଡ୍ ଭେଣ୍ଡରକୁ ବଦଳାଯାଇ ନୂତନ ଭେଣ୍ଡରକୁ ଦାୟିତ୍ବ ଦିଆଯାଇଛି । ଏହାସହ ପୁରାତନ ଭେଣ୍ଡରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜିଲ୍ଲାପାଳ ସୂଚନା ଦେଇଛନ୍ତି ।
ଏହାସହ ସେଠାକାର ପରିମଳ ବ୍ୟବସ୍ଥାର ସଫେଇକରଣ ପାଇଁ ଦେଖାଦେଇଥିବା ସମସ୍ୟାକୁ ଦୃଷ୍ଟିରେ ରଖି ଆବଶ୍ୟକିୟ କର୍ମଚାରୀ ନିଯୁକ୍ତ କରାଯାଇଥିବା ସେ କହିଛନ୍ତି ।
ଅନ୍ୟପଟେ ପାରଳା ମହାରାଜା କୋଭିଡ କେୟାର, ହିଞ୍ଜିଳି ଏବଂ ଭଞ୍ଜନଗରରେ ଯେପରି ସଠିକ୍ ଭାବରେ ଖାଦ୍ୟ ସହିତ ପରିମଳ ଏବଂ ଚିକିତ୍ସା ଯୋଗାଇ ଦିଆଯିବ ସେଥିଲାଗି ଧ୍ୟାନ ଦିଆଯାଉଛି । ଯେଉଁଥିପାଇଁ ନିୟମିତ ଭାବେ କୋରୋନା ଆକ୍ରାନ୍ତ ବ୍ୟକ୍ତିବିଶେଷଙ୍କୁ ଫୋନ୍ କରାଯାଇ ସେମାନଙ୍କ ମତାମତ ଏବଂ ତାହାକୁ କିଭଳି କାର୍ଯ୍ୟକାରୀ କରାଯିବ ସେଥିପ୍ରତି ଗୁରୁତ୍ବ ଦିଆଯାଉଥିବା ସେ କହିଛନ୍ତି ।
ଏଥିପାଇଁ ଜିଲ୍ଲାର ତିନି ଜଣ ବରିଷ୍ଠ ଅଧିକାରୀ ଡେପୁଟି କଲେକ୍ଟର, ଜିଲ୍ଲା କ୍ରୀଡା ଅଧିକାରୀ ଏବଂ ଜିଲ୍ଲା ସ୍ପଳ୍ପ ସଞ୍ଚୟ ଅଧିକାରୀଙ୍କୁ ଏହାର ସମ୍ପୂର୍ଣ୍ଣ ତଦାରଖ କରିବାକୁ ଦାୟିତ୍ବ ଦିଆଯାଇଛି । ଅଧିକାରୀମାନେ 10 ଜଣ କର୍ମଚାରୀଙ୍କୁ ନେଇ ଏଭଳି କାର୍ଯ୍ୟ 24 ଘଣ୍ଟିଆ ଜାରି ରଖିବେ ବୋଲି କୁହାଯାଇଛି ।
ଏପରିକି ଆକ୍ରାନ୍ତଙ୍କୁ ଡାକ୍ତର ଆସୁଛନ୍ତି କି ନାହିଁ, ସେଠାରେ ସାନିଟାଇଜେନସ୍ ବ୍ୟବସ୍ଥା କିଭଳି ରହିଛି, ଖାଇବାକୁ କିଭଳି ମିଳୁଛି ତାହାକୁ ପର୍ଯ୍ୟାୟକ୍ରମେ ପଚାରିବୁଝିବା ପାଇଁ ବ୍ୟବସ୍ଥା ହୋଇଥିବା କହିଛନ୍ତି ଜିଲ୍ଲାପାଳ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
