ବ୍ରହ୍ମପୁର: ଜିଲ୍ଲାସ୍ତରୀୟ ଶିଳ୍ପାୟନରେ ଏଣିକି ଜିଲ୍ଲାପାଳମାନେ ହେବେ ମୁଖ୍ୟ ପୁରୋଧା । ପୂର୍ବରୁ ଜିଲ୍ଲାପାଳମାନେ ମନରେଗା ଠାରୁ ଆରମ୍ଭ କରି ଯେପରି ବିଭିନ୍ନ କାର୍ଯ୍ୟ କରୁଛନ୍ତି ସେଭଳି ଏଣିକି ସେମାନେ ରାଜ୍ୟ ଶିଳ୍ପାୟନ ବିଭାଗର ମୁଖ୍ୟ ଦାୟିତ୍ୱ ତୁଲାଇବେ । କ୍ଷୁଦ୍ର ଏବଂ ବୃହତ୍ତ ଶିଳ୍ପଗୁଡ଼ିକରେ ଲାଗି ରହୁଥିବା ସମସ୍ୟା ଏବଂ ଏହାର ସମାଧାନ ପାଇଁ ସରକାରଙ୍କ ପକ୍ଷରୁ ଏହାକୁ ସରଳୀକରଣ କରାଯିବା ସହ ଜିଲ୍ଲାସ୍ତରରେ ହିଁ ଏହାର ସମାଧାନ କରାଯିବ । ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ସେପ୍ଟମ୍ବରରେ ପ୍ରତ୍ୟେକ ଜିଲ୍ଲାପାଳ କାର୍ଯ୍ୟଳୟରେ ତିନି ଜଣ ଲେଖାଏଁ ବୈଷୟିକ ସହାୟକ ନିଯୁକ୍ତ କରାଯିବ ।
ମଙ୍ଗଳବାର ଗଞ୍ଜାମ ଜିଲ୍ଲା ସଦର ମହକୁମା ଛତ୍ରପୁରସ୍ଥିତ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ସମ୍ମିଳନୀ କକ୍ଷରେ ଚାରୋଟି ଜିଲ୍ଲାର ଶିଳ୍ପ ପରିଚାଳନାର ସମସ୍ୟା ଏବଂ ଏହାର ସମାଧାନ ପାଇଁ କର୍ମଶାଳା ଆୟୋଜିତ ହୋଇଛି । ଯାହାର ଉଦଘାଟନ ଦିବସରେ ଯୋଗ ଦେଇ ଏହି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଅସିତ ତ୍ରିପାଠୀ । ରାଜ୍ୟ ସରକାରଙ୍କ ପକ୍ଷରୁ ଶିଳ୍ପର ବିକାଶ ନିମନ୍ତେ ଅନେକ ପଦକ୍ଷେପ ନିଆଯାଉଛି । ଏହି ପରିପ୍ରେକ୍ଷୀରେ ଏଣିକି ସରକାରଙ୍କ ବିଭିନ୍ନ ବିଭାଗର ଅଧିକାରୀମାନେ ବିଭିନ୍ନ ଜିଲ୍ଲାକୁ ଗସ୍ତ କରି ସେଠାକାର ଶିଳ୍ପାୟନ ସମସ୍ୟାର ସମାଧାନ ପାଇଁ ଉଦ୍ୟମ ଜାରି ରଖିବେ ।
ଏଥିସହ ଗଞ୍ଜାମକୁ ଆସିଥିବା ଅଧିକାରୀମାନେ ବୁଧବାର ବିଭିନ୍ନ ଶିଳ୍ପକ୍ଷେତ୍ରକୁ ପରିଭ୍ରମଣ କରିବେ ବୋଲି ସୂଚନା ଦେଇଛନ୍ତି ଅସିତ୍ ତ୍ରିପାଠୀ । ଏହି ସମ୍ମିଳନୀରେ ରାଜ୍ୟ ଶିଳ୍ପ ସଚିବ ହେମନ୍ତ ଶର୍ମା, ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ପ୍ରମୁଖ ଉପସ୍ଥିତ ରହିଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
