ବ୍ରହ୍ମପୁର: ପ୍ରତି ଦୁଇ ବର୍ଷକୁ ଥରେ ଆସେ ବ୍ରହ୍ମପୁରର ପ୍ରସିଦ୍ଧ ମାଆ ବୁଢୀ ଠାକୁରାଣୀ ଯାତ୍ରା। ବ୍ରହ୍ମପୁର ଆରଧ୍ୟା ଦେବୀ ମାଆ ବୁଢୀ ଠାକୁରାଣୀ ଶାଶୁ ଘର ଛାଡି ନିଜ ବାପା ଘରକୁ ଆସନ୍ତି । ଆଉ ସାହି ସାହି ବୁଲି ଭକ୍ତଙ୍କୁ ଦିଅନ୍ତି ଦର୍ଶନ । ମାଆ ବୁଢ଼ୀ ଠାକୁରାଣୀ ଯାତ୍ରାର ତୃତୀୟ ଦିବସରେ ଆରମ୍ଭ ହୋଇଥାଏ ମାଆଙ୍କ ଘଟ ପରିକ୍ରମା । ଆଉ ଏହି ଯାତ୍ରା ପ୍ରାୟ 29 ଦିନ ଧରି ଚାଲେ ।
ତେବେ ଏହି ଘଟ ପରିକ୍ରମା ପାଇଁ ସହର ଉପକଣ୍ଠ କୁମ୍ଭାରପଲ୍ଲୀ ଗ୍ରାମରେ ରହୁଥିବା ଏକ ନିର୍ଦ୍ଦିଷ୍ଟ ପରିବାରର ସଦସ୍ୟ ମାନେ ମାଆଙ୍କ ଘଟ ଚିତ୍ରଣ କରନ୍ତି । ଏହାପରେ ମାଆଙ୍କ ଆଜ୍ଞମାଳ ଫୁଲ ଚାଙ୍ଗୁଡିରୁ ଘଟରେ ରଖାଯାଇ ପାରମ୍ପରିକ ରୀତିନୀତି ଅନୁଯାୟୀ ପୁଜାର୍ଚ୍ଚନା କରନ୍ତି । ଆଉ ତାପରେ ଆରମ୍ଭ ହୋଇଥାଏ ଘଟ ପରିକ୍ରମା । ମାଆଙ୍କ ସହ ଆଠଟି ପାର୍ଶ୍ଵ ଘଟ ଅସ୍ଥାୟୀ ମନ୍ଦିରରୁ ବାହାରି ପ୍ରଥମେ ରାଜବାଟୀରେ ପହଞ୍ଚେ । ସେଠାରେ ପୁଜା ହେବା ପରେ ମାଆଙ୍କ ଘଟ ଦେଶୀବେହେରା ସାହି ପରିକ୍ରମା କରି ପୁଣି ଅସ୍ଥାୟୀ ମନ୍ଦିରକୁ ଫେରିଥାଏ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
