ବ୍ରହ୍ମପୁର: ଦେଶରେ ବର୍ଦ୍ଧିତ ଲକଡାଉନ ଆସନ୍ତା ମେ’ ମାସ 3 ତାରିଖରେ ଶେଷ ହେବା ପରେ ବାହାର ରାଜ୍ୟରେ ରହିଥିବା ଗଞ୍ଜାମ ଜିଲ୍ଲାବାସୀ ଜିଲ୍ଲାକୁ ପ୍ରତ୍ୟାବର୍ତ୍ତନ କରିବାର ସମ୍ଭାବନା ଅଧିକ ହୋଇଛି । ଏଥିପାଇଁ ସାମଗ୍ରୀକ ପ୍ରସ୍ତୁତିକୁ ସଠିକ ଭାବରେ ପରିଚାଳନା କରିବା ପାଇଁ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଜିଲ୍ଲାର ସଂପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏନେଇ ଗ୍ରାମାଞ୍ଚଳ ଏବଂ ସହରାଞ୍ଚଳର ସମସ୍ତ ବିଦ୍ୟାଳୟ ଗୃହ, ଅନ୍ୟାନ୍ୟ ସରକାରୀ ଗୃହ, ବାତ୍ୟା ଆଶ୍ରୟ ସ୍ଥଳ, କଲ୍ୟାଣ ମଣ୍ଡପ ପ୍ରଭୃତିକୁ ପ୍ରସ୍ତୁତ କରି ରଖାଯିବାକୁ ସ୍ଥିର କରାଯାଇଛି ।
ସମ୍ପୃକ୍ତ ସ୍ଥାନଗୁଡିକରେ ପାଇଖାନାଠାରୁ ଆରମ୍ଭ କରି ପାନୀୟ ଜଳ ଏବଂ ବିଦ୍ୟୁତ ବ୍ୟବସ୍ଥା ଯେପରି ସୁନିଶ୍ଚିତ କରାଯିବ ତାହରି ଉପରେ ଗୁରୁତ୍ବ ଦିଆଯିବାକୁ ପରାମର୍ଶ ଦିଆଯାଇଛି । ଏପରିକି ଯେଉଁଠାରେ ପାଇଖାନା ନାହିଁ ସେଠାରେ ତୁରନ୍ତ ପାଇଖାନା ନିର୍ମାଣ କରାଯିବ । କିନ୍ତୁ ନିମ୍ନମାନର ପାଇଖାନା ହେଲେ ଅଧିକାରୀଙ୍କ ଦରମାରୁ ସେହି ଅର୍ଥ ଭରଣା କରାଯିବ । ବାହାର ରାଜ୍ୟ ଫେରନ୍ତାଙ୍କ ପାଇଁ ଡାକ୍ତରୀ ପରୀକ୍ଷା ଅନିବାର୍ଯ୍ୟ ବୋଲି କୁହାଯିବା ସହ ସେମାନଙ୍କୁ 21 ଦିନିଆ କ୍ବାରେନଣ୍ଟାଇନରେ ରଖାଯିବ ।
ଏପରିକି ଯେଉଁ କର୍ମଚାରୀମାନେ ଭୁବନେଶ୍ବରରୁ ଫେରିବେ ସେମାନଙ୍କ ପାଇଁ 21 ଦିନିଆ କ୍ବାରେନଣ୍ଟାଇନ ବାଧ୍ୟତାମୂଳକ । ଯଦି ସଂପୃକ୍ତ ଅଧିକାରୀ ଏହା ସୁନିଶ୍ଚିତ ନ କଲେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ହେବ । ଜିଲ୍ଲାରେ ଅଦ୍ୟାବଧି ବାହାର ରାଜ୍ୟର ଯେଉଁ ବ୍ୟକ୍ତିବିଶେଷଙ୍କୁ ବିଭିନ୍ନ ଟ୍ରାଞ୍ଜିଟ କ୍ୟାମ୍ପରେ ରଖାଯାଇଛି ସେମାନଙ୍କ ପାଇଁ ଦୈନିକ ସାରଣୀ ଧାର୍ଯ୍ୟ କରିବା ସହିତ ମନୋରଞ୍ଜନ ପାଇଁ ସେଠାରେ ଟେଲିଭିଜନ ସେଟ ଲଗାଇବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।
ଜିଲ୍ଲାର ବିଭିନ୍ନ ଯାଞ୍ଚ ଫାଟକ ଗୁଡିକରେ ପୋଲିସ ସହିତ ସରକାରୀ କର୍ମଚାରୀମାନେ କାର୍ଯ୍ୟରତ ରହିବେ । ବିଭିନ୍ନ ସ୍ଥାନରେ ରକ୍ତଦାନ ଶିବିର ପାଇଁ ଆଗ୍ରହ ପ୍ରକାଶ ପାଉଥିବାରୁ ସେଥିପାଇଁ ଭ୍ରାମ୍ୟମାଣ ରକ୍ତ ସଂଗ୍ରହ ୟୁନିଟ କାର୍ଯ୍ୟ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଡାକ୍ତରୀ ପରାମର୍ଶ ପାଇଁ ଜିଲ୍ଲା ବାହାରକୁ ଯିବାକୁ ଆବଶ୍ୟକତା ରହିଥିଲେ ସେହି ଉପଖଣ୍ଡର ଉପଜିଲ୍ଲାପାଳ ପାସ ପ୍ରଦାନ କରିପାରିବେ ।
ସାମାଜିକ ଦୂରତା ଅବଲମ୍ବନ କରି ନିଶ୍ଚିତ କର୍ମନିଯୁକ୍ତି ଯୋଜନା କାର୍ଯ୍ୟ ଆଗେଇ ନେବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି । ବିଭିନ୍ନ ପେନସନ ଓ ଭତ୍ତା ନିର୍ଦ୍ଦିଷ୍ଟ ବ୍ୟକ୍ତିଙ୍କ ବ୍ୟତୀତ ଅନ୍ୟ କୌଣସି ପରିବାର ସଦସ୍ୟଙ୍କୁ ହସ୍ତାନ୍ତର କରାଯାଇପାରିବ ନାହିଁ ବୋଲି ମଧ୍ୟ କୁହାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
