ବ୍ରହ୍ମପୁର: ସ୍ମାର୍ଟ ହେବ ସ୍କୁଲ ଆଉ ସ୍ମାର୍ଟ ହେବେ ବିଦ୍ୟାର୍ଥୀ । ବ୍ଲାକ୍ ବୋର୍ଡ ବଦଳରେ ହ୍ବାଇର୍ଟ ବୋର୍ଡ ଏବଂ ଏଲ୍.ଇ.ଡି(LED) ଦେଖି ସରକାରୀ ବିଦ୍ୟାଳୟର ଏଣିକି ଶ୍ରେଣୀ ଗୃହରେ ବସି ପାଠ ପଢିବେ ଛାତ୍ରଛାତ୍ରୀ । ରାଜ୍ୟରେ ୫T ଅଧିନରେ ରୂପାନ୍ତରକରଣ ହୋଇଥିବା ବିଦ୍ୟାଳୟ ଗୁଡିକୁ ସ୍ମାର୍ଟ କ୍ଲାସ ରୁମ୍ ସହିତ ଇ-ଲାଇବ୍ରେରୀ ବ୍ୟବସ୍ଥାର ଭରପୁର ବ୍ୟବହାର କରି ନିଜର ଉଜ୍ଜଳ ଭବିଷ୍ୟତ ଗଢିବେ ଛାତ୍ରଛାତ୍ରୀ । ମୁଖ୍ୟମନ୍ତ୍ରୀଙ୍କ ନିର୍ବାଚନମଣ୍ଡଳୀ ଗଞ୍ଜାମ ଜିଲ୍ଲାର ଅନ୍ତର୍ଗତ ହିଞ୍ଜିଳିକାଟୁ ଓ ଶେରଗଡ଼ର ୫୦ ଗୋଟି ହାଇସ୍କୁଲରେ ଶିକ୍ଷା ବ୍ୟବସ୍ଥାର ଉନ୍ନତୀକରଣ କାର୍ଯ୍ୟକୁ ଉଦଘାଟନ କରିବେ ମୁଖ୍ୟମନ୍ତ୍ରୀ । ବିଦ୍ୟାଳୟ ଗୁଡ଼ିକର ସଂପୂର୍ଣ୍ଣ ରୂପାନ୍ତରିତ କାର୍ଯ୍ୟକୁ ନେଇ ଖୁସି ପ୍ରକାଶ କରିଛନ୍ତି ବିଦ୍ୟାଳୟର ବିଦ୍ୟାର୍ଥୀ ଓ ଶିକ୍ଷକ ।
ଆଜି ଠାରୁ ଦୈନିକ ୧୦ ଗୋଟି ଲେଖାଏଁ ବିଦ୍ୟାଳୟକୁ ରାଜ୍ୟର ବିଭିନ୍ନ ଅଞ୍ଚଳର ବିଧାୟକ ମାନଙ୍କ ଉପସ୍ଥିତିରେ ଭିଡିଓ କନଫରେନ୍ସ ଜରିଆରେ ଉଦଘାଟନ କରିବେ ମୁଖ୍ୟମନ୍ତ୍ରୀ । ଗୋଟିଏ ଦିନ ପରେ ଆୟୋଜିତ ହେବାକୁ ଥିବା ଏଭଳି ନୂତନ ବ୍ୟବସ୍ଥାର ଶୁଭାରମ୍ଭରେ ଗୋଟିଏ ବିଦ୍ୟାଳୟରେ ଦୁଇ ଜଣ ଲେଖାଏଁ ବିଧାୟକଙ୍କ ସହିତ ମୋଟ ୨୦ ଜଣ ବିଧାୟକ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଉତ୍ସବରେ ସାମିଲ ହେବେ । ଓଡ଼ିଶା ବିଧାନସଭାର ୧୦୦ରୁ ଊର୍ଦ୍ଧ୍ୱ ବିଧାୟକ ଏସବୁ ବିଦ୍ୟାଳୟ ପରିଦର୍ଶନ କରିବା ସହିତ ଉଦ୍ଘାଟନୀ ଉତ୍ସବରେ ହେବେ ସାମିଲ ।
ତେବେ ପ୍ରତ୍ୟେକ ଉଦ୍ଘାଟନୀ କାର୍ଯ୍ୟକ୍ରମରେ ଯୋଗ ଦେଇଥିବା ରାଜ୍ୟର ବିଧାୟକ ମାନେ ରାଜ୍ୟ ପର୍ଯ୍ୟଟନ ଯୋଜନାରେ ହାତକୁ ନିଆଯାଇଥିବା ବ୍ରହ୍ମପୁର ସହରର ରାମଲିଙ୍ଗେଶ୍ବର ପାର୍କ ସହିତ ମିନି ଷ୍ଟାଡିୟମ୍ ଭଳି ବିଭିନ୍ନ ବିକାଶ କାର୍ଯ୍ୟକୁ ପରିଦର୍ଶନ କରିବେ । ଯାହାକୁ ନେଇ ଗଞ୍ଜାମ ଜିଲ୍ଲାର ପ୍ରଶାସନ ମଧ୍ୟରେ ତତ୍ପରତା ପ୍ରକାଶ ପାଇଛି । ଆଉ ସରକାରଙ୍କ ଏହି ଯୋଜନା ମାଧ୍ୟମରେ ସଂପୂର୍ଣ୍ଣ ବିଦ୍ୟାଳୟରେ ରୂପାନ୍ତରୀତ କାର୍ଯ୍ୟରେ କେବଳ ସ୍ମାର୍ଟ କ୍ଳାସ କିମ୍ବା ଇ ଲାଇବ୍ରେରୀ ବ୍ୟବସ୍ଥା ନୁହେଁ ବରଂ ଖେଳପଡିଆ ଠାରୁ ଆରମ୍ଭ କରି ବିଦ୍ୟାଳୟରେ ପାନୀୟଜଳ ଏବଂ ଅତ୍ୟାଧୁନିକ ଲ୍ୟାବ ବ୍ୟବସ୍ଥା ଭଳି ଅନେକ ବିଷୟକୁ ଦିଆଯାଇଛି ଗୁରୁତ୍ବ ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
