ବ୍ରହ୍ମପୁର: ବିପୁଳ ପରିମାଣର ପୋଚ ଓ ରନ୍ଧାମଦ ଜବତ କଲା ଅବକାରୀ ବିଭାଗ । କୋରୋନା ମହାମାରୀ ସମୟରେ ଗଞ୍ଜାମ ଜିଲ୍ଲାରେ ବହୁ ପରିମାଣରେ ଚୋରା ମଦ କାରବାର ଜାରି ରହିଛି । ଏଭଳି ସମୟରେ ଜିଲ୍ଲାର ଦିଗପହଣ୍ଡି ଥାନା ଅଞ୍ଚଳର ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇ ବିପୁଳ ପରିମାଣର ପୋଚ ଓ ରନ୍ଧାମଦ ଜବତ କରାଯାଇଛି ।
ବିପୁଳ ପରିମାଣର ପୋଚ ଓ ରନ୍ଧାମଦ ଜବତ କଲେ ଅବକାରୀ ବିଭାଗ
ବ୍ରହ୍ମପୁର ଅବକାରୀ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ଦିଗପହଣ୍ଡି ଥାନା ଅନ୍ତର୍ଗତ ବାଟ ମହୁଲିପଡା, ତିନିଘରିଆ, ଡାଲି ମହୁଲିପଡ଼ା ଭଳି ଦୁର୍ଗମ ଅଞ୍ଚଳରେ ଚଢାଉ କରାଯାଇ ବିପୁଳ ପରିମାଣରେ ଗୁଡ଼ ମିଶ୍ରିତ ମଦପୋଚ ଓ ରନ୍ଧା ଦେଶୀମଦ ଜବତ କରାଯାଇଛି ।
ସମୁଦାୟ ୪୪୦୦ କିଲୋଗ୍ରାମ ଅପମିଶ୍ରିତ ଗୁଡ଼, ମହୁଲ ଓ ପୋଚ ଜବତ କରାଯାଇଛି । ତେବେ ଅବକାରୀ ବିଭାଗର ଚଢାଉ ସମୟରେ ମଦମାଫିଆ ମାନେ ଫେରାର ରହିଥିବା କାରଣରୁ କାହାରିକୁ ଗିରଫ କରାଯାଇନାହିଁ । ଏନେଇ ଏକ ମାମଲା ରୁଜୁ କରି ଅବକାରୀ ବିଭାଗ ପକ୍ଷରୁ ତଦନ୍ତ ଜାରି ରହିଥିବା ସୂଚନା ମିଳିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
